大舖價平過水貨!360 相機清貨減價,邊部入得過?

左定坤 (Cho Ting Kwan) 2016-12-05 17:57 | 市場行情
不知大家還有沒有印象,版主之前曾經同大家提過,想買番隻 360 相機。當時版主自己都心大心細,諗住平平地入手 LG 360 Cam 就算,但三星 Gear 360、Ricoh Theta S 都好吸引,真係令版主唔知點揀好。最後終於受不住誘惑,入手了 Ricoh Theta S,令我無言的是,買完之後 Gear 360 衛訊忽然來個瘋狂勁減,跌到比部份水貨舖還要便宜,想買 360 相機的網友,會考慮 Gear 360 嗎?版主揀了幾款比較正路的 360 相機,睇下大家會怎樣選擇。看下文吧!

360 Cam(Facebook).jpg

只怪太封閉?三星 Gear 360 大舖平過水貨
大舖減價情報,版主說得最多的,應該是手機,點解今次忽然間會講相機呢?無辦法,雖然平時大舖相機都會有減價,但真係覺得特別抵玩的並不多,不過今個星期開始,衛訊做緊聖誕減價優惠,居然將三星 Gear 360 減到平過水貨!Gear 360 原價 $2998,之前一直做緊「即減 $500」的優惠,不過而家聖誕再減多 $400,只需 $2098 就能入手,仲會送自拍棍以及 64GB SD 卡,比起出面嘅水貨價還要便宜 (水貨大約賣緊 $2100 / $2200 左右)。其實唔少人對 Gear 360 的評價都算不錯,但可惜就是一定要三星手機先用到,實在太封閉,會唔會都係導致少人買的主因呢?呢個價錢,網友又覺得抵唔抵玩?

15311625_354834011542078_174882882_o.jpg
▲ 版主去果間衛訊未轉個價錢,不過在店舖內的宣傳海報中,已經寫左最新賣價為 $2098。

$2300 有找,Ricoh Theta S 會唔會更好玩?
版主買了 Ricoh Theta S 一段時間,放假出親去玩就會帶埋部機出去影 360 相,老實講成像表現確實不錯,只係 upload 上 Facebook 的時候,就會變得好模糊。但整體來說,版主感到相當滿意。Ricoh Theta S 版主之前在百老匯買,都要 $2880,有 12 個月免息分期。如果你捨得一筆過付款,細舖大約可以平多二三百蚊,約 $2670 左右。至於水貨方面,最新賣價則約 $2270,但都係果句,水貨嘛,保養實係有點麻煩,甚至可以係無。

15388719_354837944875018_1789806522_o.jpg
▲ 講外型,我覺得 Ricoh Theta S 會比 Gear 360 正路一點,始終三星果款好似... IP Cam 咁。$2300 有找,你會唔會考慮?

最平價 360 相機,會是它嗎?
講到最平價最抵玩的 360 相機,版主就覺得應該還是 LG 360 Cam,不過講嘅唔係行貨,論質素來說,行貨的價錢似乎給不到版主入手的理由,但係水貨買黎玩下,我又覺得未嘗不可。講左行貨先,其實 LG 360 Cam 出面嘅細舖行貨價錢都唔平架,大約都要成千五六蚊,呢個價錢已經可以買到早前在 Indiegogo 眾籌集資的 Nico360 (版主之前都曾經對呢隻嘢有興趣!)。不過水貨而家普遍都係 $900 有交易,買嚟當玩具,網友又覺得入唔入得過呢?以上三部 360 相機當中,你會覺得邊隻最抵玩?

LG-360-cam.png
▲ $900 唔使,我會覺得水貨入得過多啲。你又點睇?

最新新聞