近日有串燒店負責人喺樹仁大學嘅 Secrets FB 頁面留言，大鬧一班自稱樹仁大學工商管理系學生 R 完 Sponsor 之後，竟然唔蒲頭攞食物。串燒店廚師特定專程去買材料，又提早開工準備咗一盤燒雞翼同一盤魚蛋，準備學生搞系會就職典禮。點知到咗預定時間全部放飛機，仲訛稱好多同學臨時發燒，活動取消，又話 WhatsApp 聯絡咗串燒店。串燒店負責人認為學生冇交帶，浪費咗食物之餘，仲嘥咗師傅一番心機同時間。網民鬧爆呢班垃圾大學生，似乎直到版主交稿呢一刻都冇人出嚟 Say Sorry！跳轉睇下串燒店負責人嘅原文。
[SEP]
2017年2月23日，一班自稱香港樹仁大學第七屆工商管理學系系會嘅學生去到串噹噹，話3月10日將會有就職典禮，邀請串噹噹贊助食物。廚師當晚就答應可以提供一盆麻辣魚旦同一盆雞全翼，亦叫佢哋當晚六點嚟拎。當晚我就代廚師同佢哋簽約，期間佢哋多謝前多謝後，都算有禮貌，有禮貌到我都唔好意思。
2017年3月10日，即係今日，廚師提早返嚟開爐燒雞翼同烚魚旦，亦專程去買兩個大錫紙兜，一心諗住六點後要交食物俾呢班同學，一直等到18:44分，鋪頭問我有無呢班同學聯絡方法，我叫佢哋搵返合約出嚟。上面有三個電話號碼，鋪頭打咗兩個發現一個唔通一個唔聽，已經心知不妙。同時我亦搵城大中文現莊同學幫手搵樹仁現莊同學幫手搵佢哋（同U就職典禮應該其他莊會去掛？）點知真係唔去！不過呢位樹仁中文系嘅同學都好好人，再托上托幫我搵，唔該哂你。終於俾我哋打到個聽電話嘅，證實我哋真係信錯咗呢班同學。同學話「已經whatsapp咗你」「打過俾你但唔通」「我哋好多同學發緊燒」「我哋活動取消咗」「唔好意思」。同學，我諗我電話對你電話敏感喇，我一直都whatsapp緊，亦有其他人通過電話，講緊電話再有電話打嚟都有電話入功能，但偏偏就淨係收唔到你whatsapp同電話。問你幾點通知，你話六點左右。六點左右先集體發燒呀係咪？六點左右先決定取消呀係咪？其實你只需要提早兩三個鐘通知我哋，我哋都唔會煮你份嘢食，仲會關心吓你健康，叫你保重身體。但係同學，六點係要拎嘅時間，時間觀念呢？交帶呢？誠信呢？
其實嗰兩盆雞翼同魚旦嘅成本有限，其實樹仁咁遠俾你宣傳完效用亦唔會大，要效用大我贊助理工唔好？（利申：無理工同學嚟搵過sponsor）不過見到你哋老遠走嚟紅磡搵贊助，仲話希望搵哂港九新界咁勤力，我哋都有將你嘅就職典禮放上心，寫上日曆。
最後祝你哋早日康復，做個有交帶有誠信嘅大學生，要知道唔係我哋唔體諒你哋病，而係你哋破壞咗別人對你哋嘅信任。
最最後，呢個時代，大學生已經通街都係，亦都唔再巴閉，更加背負住一大堆罪名，請大家唔好再影衰大家，影衰同你同一個時代但想做好自己嘅人。
資料來源：SYU Secrets