好多人去旅行都選擇唔食飛機餐，除咗食物難食之外，亦希望減少自己需要上廁所「開大」嘅機會。畢竟飛機上幾百名乘客，你走入廁所「開大」，隨時要大排長龍，又有機會俾人敲門騷擾，而味道亦令到自己覺得尷尬。究竟咩時候先係「辦大事」嘅最佳時機？跳轉由空姐話你知。
[SEP]
外國 Mel 雜誌搵咗前空姐 Erika Roth 教路，原來飛機起飛後，安全帶警報燈解除後就係去廁所「開大」嘅最好時機，如果你錯過咗呢個機會，第二個最佳時機就係空中服務員派發飲品小食嘅時候，通常乘客會為咗飲杯嘢或攞包小食而乖乖坐好，咁就有較多時間免受騷擾。
如果你擔心「辦大事」嘅氣味影響他人同尷尬，Erika 建議向空中服務員攞幾個載咖啡粉嘅包裝，然後喺「辦公」前掛喺廁所裏面辟味，雖然空服會知道你想做乜，但好過味道引來尷尬。Erika 話如果唔想俾人知道，就只好自備細小嘅空氣清新劑；不過千祈唔好嘗試以香水或古龍水辟味，只會越整越難聞。最後 Erika 提醒真係需要喺飛機上「開大」嘅旅客，千萬唔好嘆慢板霸住個廁所，否則好容易俾人敲門，隨時令自己更加唔暢快。
資料來源：lifehacker