香港地打工仔往往慘過做奴隸，最近有網民講出一個喺尖沙咀某商場女廁遇到嘅親身經歷，竟然有商場管理層，喺強迫清潔姐姐向每個用完廁所嘅人客講「再見」之餘，但又唔俾佢哋飲水，搞到姐姐聲都沙埋，仲要向客人講「唔好意思，我好口乾，同唔到你哋每一個講再見」。究竟邊間商場咁衰？跳轉有更多詳情。
[SEP]
睇下網民喺 Maysum 嘅親身經歷：
========================================
我想講呢件事出來，唔係要搏咩。但我既fb有不少有關方面既高層。我好希望佢地見到，然後可以檢討下呢件事！事緣今日係尖沙咀某大商場如廁。
有個清潔姐姐聲都沙晒，都要頂住同我講"唔好意思，我好口乾，同唔到你地每一個人講再見"我好驚訝地又天真地問"咁仲唔飲水？"點知阿姐話，公司規定，工作時唔可以飲水，就算帶係身邊，收入廁所，都唔比！一發現左就會掉！聽完真係好嬲！會唔會太唔人道呀？你要d阿姐同每一個如廁後既人講再見，但講足一日都唔比飲水！原來佢地就算無野抹，個身體都要郁，因為企定定的話會比人話！如果比人影左相就會投訴去上面！
總之工作咁多個鐘，就要不飲水不休息地做！！將心彼己丫，你兩個鐘唔飲水都辛苦啦！何況一個咁努力維持廁所清潔既員工！！！
其實， 清潔阿姐都係人，都有需要，好應該整個休息室比佢地，隔一段時間休息下，唔係全日係個廁所，咁多細菌既地方standby! 亦絕對唔應該限制佢地有飲水既人權！！邊間商場我唔講啦，唔好影響阿姐(我真係不能開名，以保護阿姐，sorry)。而我亦相信唔係一間半間既問題！我見過阿姐食lunch要係廁所食！！其實我地每一個人都唔應該要係廁所休息同食飯！
商場又好，公廁又好，可唔可以拎番d人性出來對自己既員工？！
最後買左枝水比阿姐，叫佢拿拿林飲左佢快手掉埋佢，阿姐好瘦好瘦……我記得佢講左句“ 而家搵食好難架” 我好希望一個人既努力有回報，至少能得到尊重！
========================================
其實細個老師就已經有教，每個人每日要飲 8 杯水，而家開工幾粒鐘體力勞動，仲要 Keep 住講嘢，但就唔俾飲水，真係同做奴隸冇乜分別。
資料來源：FB @Maysum makeup artist/飄眉師/唇膏雕刻家/藝術家/插畫師