千五有找玩到 S801 仲可以防水！ Sharp SHV31
因為一般用家鐘情大芒機，係香港要揾到 5 吋芒樓下的 Android 手機實在唔易，要規格不錯就更難。 Sharp 的 SHV31 就算係一個比較罕有的選擇，只有 4.5 吋 IGZO 芒但就用上 FHD 解像度兼有 IPX5/IPX7 防水規格。而係硬件方面都有 Qualcomm S801 2.3GHz 處理器，相機就係 1310 萬像素主鏡配 120 萬像素前鏡頭。比較尷尬係手機只係得 2GB RAM 以及 16GB 內置容量。還好，係價錢方面，而家 Sharp SHV31 相較 15 年 9 月初到港時的價錢，已經平左唔少，價錢只係 $1480 。千五蚊有找搵到 S801 手機，即使係水貨都不容易呢！
▲ 貴為 Sharp 出品，大家可以見到 Sharp SHV31 前鏡係機面下方的。
▲ 4.5 吋芒的 Android 手機，近年實在少見，能夠完美的單手操作應該也是賣點吧？
▲ 機背大家覺唔覺得好有往日 Sony 的風格呢？
跌至千元價，性價比更高？HTC Butterfly 3
HTC Butterfly 3 可以話呢篇文章重點所在！之前同大家提過，最後沒有在香港推出的 Butterfly 3 ，因為價錢相對唔算貴的關係，近月一直係最受歡迎的日系水機。 Butterfly 3 係 11 月尾到港時，賣價大約要 $2700 ，以 2K 芒再配 S810 處理器來講，性價比可以話唔差。而近日 Butterfly 3 日水價錢更加跌破二千， $1880 就有交易。唔知呢個價位又能否吸引更多人入手呢？
▲ Butterfly 3 水貨一到港已經好收歡迎，而家價錢更平會唔會更 Hit ？
這個價錢應是「最平日水」吧！ Stream S
好，性價比最高的千元日水機都提過（當然仲有萬年長青款 LG V31 呢批，但佢哋近來都無乜動靜，就唔再多提了），但明明標題寫住，最平 $700 ，係咩一回事呢？講緊嘅就係 Stream S 。作為一部日系機，基本要素佢都有，就係外型四四方方有點日系 feel ，不過以呢個價錢來講，規格就好難有甚麼要求了。Stream S 的 4.7 吋 TFT 屏幕得 HD 解像度，而處理器都只係 Kirin 910 配 2GB RAM 以及 8GB 內置容量(最大支援 32GB SD 卡），相機方面就有 800 萬像素主鏡頭同埋 500 萬像素前鏡頭。另外要留意係， Stream S 本身係支援唔到香港 4G 的，但店主提到佢哋可以令手機顯示返 LTE，不過速度會較一般 4G 慢。另外，其實呢部手機係華為 P6 的日本版，並非日本牌子推出的日系機，價錢方面只係 $660 你又點睇？
▲ 一見 $660 呢個價錢大家都會明白，部機規格唔會好得去邊。
▲但以 $660 呢個價錢來計, Stream S（即係華為 P6）外型都叫靚仔。
▲ 8GB 內置容量，係一開機之後只有 4.24GB 可用，相信呢部機只能做「士啤」機了。