伏!三星 Note 8 淨機即減一千!用「支付寶」俾錢就得?

Keith Yim 2018-01-23 19:58 | 3 香港
有兩件事,若果你係 ePrice Fans 都一定知。首先,Samsung GALAXY Note 8 賣價一直企得好硬,最近係大舖先少跌三百。另外,就係版主們其實都對「支付寶」一直意見!但今次呢個優惠又堅好抵,只要你用「支付宝」俾錢,Note 8 可以即減一千!「支付寶」「支付宝」....版主,你做乜又繁又簡!我會話,支付寶好麻煩就真,點解?



3hk-fb.jpg



繁體中文推中國大陸版「支付宝」優惠

是咁的,支付寶係香港,其實已跟長和集團聯合成立公司,所以長和集團旗下,包括屈臣氏、3 香港都力推支付寶呢個支付工具。以 3 香港為例,早前我哋都講過有關「支付寶」嘅付款及月費優惠。不過,今日版主經過門市,真係被激死!睇睇下圖就知,大大幅 Banner 用繁體中文寫明「旗艦手機優惠,用支付寶付款享高達港幣 $1000 淨機折扣。睇一睇減價單,Note 8 減一千喎,真係四款機裡面最抵。Samsung Galaxy Note 8 係大舖最近都只係即減三百蚊,佢減一千,又唔駛上台,抵喎!



版主立即問問呢個 Offer,點知得到一個令人氣結的答案:



「對不起,呢個支付寶,係講緊中國大陸專用嘅支付寶。香港人用嘅香港版支付寶無份。」



呢個優惠,香港人無份,香港人無份,香港人無份,講三次!



3hk01.jpg



我再望一望 Banner,係喎,最底咪用左簡體字寫「支付宝」!係呢到版主提提大家,香港人最多人用嘅 VISA、MasterCard 當中嘅電子支付部份,真係全世界都用到。不過,成日講到中國大陸好勁,勁過英美全球嘅支付寶,微信支付,大陸人有專用錢包,跟香港人嘅完全唔一樣,亦因為咁,出面好多優惠,寫住支付寶,微信支付優惠其實十有九唔關香港人事。



香港人專用嘅支付寶,唔係叫「支付宝」,正名叫「支付寶 HK」

香港人專用嘅微信支付,唔係叫「微信支付」,正名叫「WeChat Pay」




我心唸,你想做中國大陸人生意,我明白,咁用簡體中文做 Banner 囉,大部份香港人,鬼知你個「支付宝」分咁多個版本咩!仲有,反正 3HK 都只係識叫香港人上台,人哋 CMHK,數碼通,csl 全部有淨機賣,香港人,大陸人同價,我買機,會幫親你間 3HK?



網友大家點睇?

最新新聞