「手機特賣場」再開!手機平板一齊減!
是咁的,係中移動 CMHK 個官網上的「我的網上商店」,係有一個叫手機特賣場的東西,顧名思義就梗係有平野(或者係要清的貨)就會係手機特賣場賣,非 CMHK 客戶都可以幫襯但就唔係長開的。不過,昨日手機特賣場忽然再開,同時有好幾件產品出沒,平板手機全部有份!以平價來講,當中兩部 LG、Sony 的中階機(而家來講就係入門規格) LG G4 Beat 同埋 Sony C4 Dual 就夠曬平。 G4 Beat 表現看來規格不錯,有 5.2 吋 FHD 芒同埋 Qualcomm S615 處理器,相機係 1300 萬像素主鏡頭同 500 萬像素前鏡都叫做標準。但部機只係得 1.5GB RAM 同 8GB 內置容量都幾難搞。係價錢上,今次 CMHK特價就只係 $1280 ,比起大鋪再平多 $400。而另一部 Sony 的 C4 Dual ,係規格上會「無咁伏」,但價錢就會貴少少, CMHK 特價係 $1580 ,比大鋪平 $300 到。係平板方面,價錢雖然比較貴,但卻係幾抵玩的,因為大減價對象是 Samsung 的 Galaxy Tab S2 啊!前排都同大家提過有關 Samsung 平板在大鋪減價的消息。其實係上月劈價之後,平板係大鋪已經無點樣減價, Tab S2 價錢都大約係 8 吋芒 $3588 (4G版) 以及 9.7 吋芒 $4188 (4G版)。而今次 CMHK 做的減價就更平, 8 吋芒版本平左 $300 賣 $3280 ,而 9.7 吋芒就平更多,賣 $3480 ,平左 $708 !
有關手機特賣場,版主留意到 CMHK 今次供貨數量相當少,大家可以見到只係得幾部,但有時係產品賣光之後,又會再有補貨的情況出現,所以實在好難確認到底貨量有幾多。只能夠話,過左成晚,係版主打緊稿時,手機特賣場一直都係顯示得幾件貨的 G4 Beat 、 C4 Dual 、 Tab S2 8 吋以及 9.7 吋芒版,都仍然有貨咁啦!
▲G4 Beat 係有金、白、銀三色,每隻色都有幾件存貨。
▲而 C4 Dual 就有白、黑、綠三色,當中以白色貨量最少。
▲Tab S2 版主相信頗受歡迎,因為間中見到售罄的情況,但係文章發佈時又有貨。
▲9.7 寸減得比較多,但好似無乜人買,存貨最少都有 5 件。
搶唔到平機又點算?客戶買 LG V10 、 Samsung S6 都有著數!
可能有不少網友係睇到呢篇文時,手機特賣場所有貨都已經售罄。為左保障自己唔會被讀者「X 到上太空」,而家再提個比較多人受惠的減價消息先!其實除左開放手機特賣場之外, CHMK 仲有一個「人人有份淨機折扣優惠」。得罪講句 CMHK 淨機價同抵玩實在扯唔上甚麼關係,因為價錢唔夠 csl 或者大鋪鬥。但係優惠當中,部份機款的「簽約優惠價」其實係比起 csl 或者大鋪都要平的!好似 LG V10 就只係 $4280 ,而 Galaxy S6 都只係 $3980 。版主就覺得,零舍係呢兩部機價錢比起外面平,可能意味住其實 V10 以及 S6 都仲有減價空間呢!▲其實 CMHK 「淨機折扣」並不抵玩,但係 V10 以及 S6 的「簽約優惠價」就真係平過對手啦!
按此看更多: CMHK 「人人有份淨機折扣優惠」
參考: CMHK 官網