隱世增值服務 ＄38 包每月 2GB Extra Data
是咁的，冇無限上網，參加左上台計劃，又用爆 Data 點算？一係 Sharp Cut 唔俾上網；部份網絡商標榜用爆指定用量，送你 128kbps 地獄網速等你 keep 住只能玩 WhatsApp 同 FB Messenger，其他應用，慢到用唔到 (Click 呢到有一個例子) 。不過，大部份都係可以俾錢加大用量嘅！以中國移動香港 CMHK 為例，其「本地」及「大中華」四地話音及數據聯用計劃用家，用爆 Data，其實都可以用最平 $20 / 0.5GB 或 $30 / 0.5GB 嘅價錢買 Data。基本上，你用嘅 Plan 越平，要再買 Data 就越貴。例如你用佢地嘅本地 4G 每月 1GB 數據計劃計算，用爆你真係要 $30 / 0.5GB 咁去買! 計起上來，2GB 用量就要俾多 $90。
不過，佢地有個隱世增值服務！好奇妙！當你上台嘅陣，只要肯月費加多 $38，就可以換多 2GB 當月數據，仲係正常速度 4G Speed，無時間限制，唔係某台嘅「歡樂通宵」 (按呢到了解更多)。本來 12 個月合約嘅 1GB Plan，要收你 $186，但可以用呢個方法，加到變 3GB 用量，但月費只係 $224 (兩個計法都包左行政費)，比起本來 3GB Plan 嘅 $236 月費 (包行政費) 仲要平！若果，你堅持用 1GB 計劃，$38 包 2GB 比起上面講嘅 $120 先有 2GB，有大約三折左右！
▲ 本來月費計劃裡面，用多左要用 $30 / 0.5GB 或 $20 ／0.5GB，要加多 2GB，每月就要多俾 $80-$120。
「UTV韓風精選組合」重點是 Data
呢個 $38 增值服務，佢地用 「UTV韓風精選組合」作包裝，唔睇真 D ，真係唔知佢 up 乜! UTV 係類似 HKTV 嘅 OTT 網上電視服務，推出左好多年 (按呢到回帶)，但無論 HKTV 出左，到停止本地製作，再到樂視+ 大台 OTT Super，UTV 都係繼續低調作業，最出名就係亞視就摺之時，免費播放六合彩及賽馬 (回帶按呢到)，唔駛俾大台獨大 (家陣陣仲係 UTV 裡面播緊架)。UTV 其實有盒子 App、iPhone 與 Android App。呢個「UTV 韓風精選組合」本來係想你俾 $38 去收睇佢地當中嘅兩條韓國頻道，包括 KMTV 及 tvN。後者其實 Cable、NowTV 都有轉播，而 KMTV 可以講係 UTV 獨家，全日播韓國 MV，tvN 就係播韓劇與南韓綜合節目。你可能有 NowTV 仲有樂視，真係唔想再多一個 UTV，所以當中送多 2GB 數據用量，先係呢個組合嘅核心價值。大家唔駛擔心，呢 2GB 係正速之餘，仲係無用途限制，唔係一定要你用係睇 UTV 上面嘅。
▲ UTV 組合，重點係 $38 每月包 2GB 數據用量。呢 2GB 只可限係香港使用。此外，送 2GB 呢個優惠，申請期至 31/7。
每月加 $10 換五日韓國 Daypass 上網 Plan
中國移動香港做緊優惠，將 $38 嘅 「UTV韓風精選組合」加至 $48，並要簽約 24 個月，不過，呢十蚊嘅加幅，換來五日數據漫遊自由圈南韓 5 日通行證一份，即係去一次南韓首五日上網免費，唔駛再買漫遊儲值卡，此外，每 20 名成功申請者中更有一位可獲雙人來回首爾機票乙份。
▲ $48 簽 24 個月合約，包 2GB 再加一個 5 日嘅韓國數據漫遊 Pass，申請日期都係至 31/7。
同場資訊：2CM 要收行政費
其實，CMHK 用家，用爆 Data，唔一定要用官方價錢買 Data，因為佢地有個叫「2cm」數據買賣市場 (按呢到了解更多)。呢個場好處係非限速、舊無限上網嘅 CMHK 用家，可以互相賣買 Data。用唔晒係呢個場到放售。由於一直 CMHK 零收費，所以不少用家使用。不過，2cm 係八月份起，就要收費了，賣方要付每 1GB HK$5 行政費予 CMHK。唔知會唔會因為咁，以後 2cm 會少左人賣 Data，上面講嘅 「UTV韓風精選組合」，其實圍起上來 $19 / GB，反而最著數？版主唔係 CMHK 嘅付費用家，有無網友可以分享一下。
▲ 2CM 終於要收費了。