網絡商爭霸戰！HKBN 出招反擊 SUN Mobile，夠唔夠鬥？

本來講最抵玩的網絡商，版主覺得應該會係 HKBN，點知突然間 Sun Mobile 出大絕，爆左個 $78 Plan 出黎，打到 HKBN 應一應。HKBN 點會忍得住唔反擊吖，就在今日，HKBN 終於出手了！係唔係有減價？又夠唔夠 Sun Mobile 鬥呢？睇下文啦！



今次講嘅，唔係行 SmarTone 網絡的 $108 Plan，而係行 CMHK 網絡的 $90 Plan。記得版主之前都有提過，而家只要係由 csl. / 1010 / Sun Mobile 轉過去 HKBN $90 Plan，就會額外送 $200 超市禮券。不過，今日版主收到消息，如果你有員工証，或者有公司咭片，就可以額外再送多 $100，即總共有 $300 coupon。咁計番 24 個月扣除優惠，平均月費為 $77.5，相比 Sun Mobile 仲要平多......5 毫子。不過，既然都係要員工証或者咭片，咁點解唔直接申請 $98 用 SmarTone 網絡的企業 Plan 呢？問過 HKBN 員工，佢表示要視乎你個人的需求，追求平價，可以考慮 CMHK Plan；追求速度，就可以選用 SmarTone Plan。


▲ 版主問過，有員工証或者公司咭片，可以額外送多 $100，即總共 $300 超市禮券。

另外，版主見到有網站寫，HKBN 推出左「新客戶推薦計劃」，介紹朋友用 HKBN，推薦人同受薦人都會有 $150 月費回贈，如果受薦人係 csl / 1010 / Sun Mobile 轉過去 HKBN，就會額外有 $200 超市禮券，計番係 $69 / 月喎。

版主呢度想講清楚兩樣嘢:
1) 下？$150 推薦回贈 + $200 coupon，加埋都係 $350，扣除優惠點計都係每月 $75 左右咋喎。受薦人回贈果 $150 又唔係落你袋，又點可以當回贈 $500，平均月費 $69 呢？

2) 版主收到的消息係，由即日起至 5 月 31 日，HKBN 無錯係有推出「新客戶推薦計劃」，不過推薦人同受薦人係可以享有 $200 月費回贈先啱。玩法係咁，sales 會向客戶 A 介紹呢個「新客戶推薦計劃」，然後客戶 A 就要介紹你的朋友 B 上台，並提供你的專屬推薦號碼 (推薦號碼可以登入番你的賬號搵到)，而朋友 B 就可以透過自選登記站 / 推廣熱線，提供客戶 A 的推薦號碼，並登記上台。咁就可以大家都有着數，享有 $200 月費回贈。而如果你嘅朋友本身係 csl. / 1010 / Sun Mobile 的客戶，轉到過黎就可以額外額 $200 超市禮券 (注意，係你朋友先有，介紹人係無的）。

最後，HKBN 兩個月費 Plan，加埋 Sun Mobile $78 Plan，三個選擇當中你會點揀呢？留言講下啦！