Low Latency 低時延是重點
版主睇番某 D 媒體嘅報導，仲係好愛不停做網絡測試，差唔多係「月經」文，而試來試去都係速度嘅時候，好多網友都話，快到 100Mbps 又點，我個 Plan 得 5GB 咋喎! 今日數碼通同佢地嘅網絡設備供應商 Ericsson 示範了 5GB 技術，與別台嘅 Demo 唔同，今次佢地唔再將重點放係速度，反而係應用！愛立信 Ericsson 香港及澳門科技總裁李仲明則表示，5G 制式嘅制定，比起以前最大唔同係參考了不少行業嘅需求而設，不再只針對普通寬頻用家，而重點係除了速度，就係要把網絡時延，做到個位數字，10ms 以下甚至是 1ms。識睇嘅，尤其打機一族當然知道，佢地唔會用 4G 網絡去打 Network Online Game，因為現時 4G 嘅網絡時延 Latency 都做唔夠低，有 20ms 已好勁，網絡時延唔夠短，打機反應都會慢好多。但原來係實際環境，網絡時延唔夠低，我哋好多時係電影見到嘅遙控機械人嘅高科技技術，係跟本實踐唔到。而 5G 網絡嘅 Low Latency 低時延的規格，容許你可以係一個好遠嘅地方，透過 5G 網絡遙控機械人....唔係表演，可以係危險嘅地方進任務，可以進行人類去唔到造唔到嘅地方，可以造幫忙手術...當然仲有好準確嘅無人駕駛汽車。
▲ 5G 除了速度外，可以去到 10GBps 速度外，最主要係 Latency 目標做到 1ms，而電池效能亦可以提升。
▲ 5G 嘅世界已唔再係 2K, 4k, 8K 電影，幾快下載一套 Bluray 質素電影咁簡單，5G 制式制定時，係會跟據各行各業應用嘅需要而定。
▲ 呢段係示範模擬 5G 網絡下，遙控有滑輪機械人，令佢企係到。4.5G 網絡嘅速度，其實已可以好快咁由控制台傳送指令去機械人，但要真係做到令佢實時平行，就要好低嘅 Latency，去到 10ms 或以下。10ms 或以下嘅 Latency，一直只有透過 CAT5 LAN 線，WiFi 也做唔到。但來 5G 系統，10ms 或以下嘅 Low Latency 將會係一個必然嘅標準！
▲ 5G 網絡亦當然有番咁上下速度，實時視像睇到機械人嘅現場環境，甚至用 AR / VR 方式透視現場情況也有可能做到。結合埋 Low Latency 優勢，實時操控機械人拆炸彈，處理核癈料，就唔駛再由人類去做了。
▲ 5G 大約係 2020 年商用，但係網絡商與設備供應商都已預備中。SmarTone 與 Ericsson 示範了一部原始嘅 5GBps 嘅上網速度。愛立信 Ericsson 香港及澳門科技總裁李仲明 (右) 表示，今次示範是用上 400MHz 嘅頻寬，才做到呢個速度。咁你會問，加陣嘅 900 / 1800 / 2100 / 2600 等頻段，可以升級至 5G 嗎？ SmarTone 科技總裁鄒金根先生 (左) 表示，其實 5G 與家陣 4G LTE 不是割裂的，是可以透過網絡升級達至 5G 標準。5G 標準除了高速，就是 Low Latency，後者是不難做到，但速度上面，現存嘅頻段嘅頻寬，係不能提供像測試中嘅高速傳輸，所以未來政府也會釋出高頻段嘅頻段，去應付未來發展。
4.5G 都唔係速度咁簡單
跟據 Ericsson 與 SmarTone 嘅人員解釋，商用的 5G 最快都要 2020 先會係香港出現，都要等幾多三年喎，咁呢三年係咪無技術突碼？唔係，Ericsson 與 SmarTone 都示範了 4.5G 嘅應用，唔駛等好耐，係今年就用到。大家要留意，都唔係只講速度！
▲ 其中一項好快會出現嘅 4.5G 技術是 NB-IoT，即 Narrow band Internet of Thing。NB-IOT 唔係講上網速度，反而用來傳送一 D 好細嘅資料包。由於資料包體積好細，例如係定位數據，咪標讀數，網絡商可以做得很強的發射功率。舉個例，S 台嘅 1800 4G 頻段，若果要用係手機上網，去到地庫一層已收唔到訊號，但 NB-IOT 容許細少嘅資料包，在更深更入嘅地方接收與發送，如圖中嘅示範，就係可以利用 NB-IoT 做到室內定位，自動泊車。而 NB-IoT 儀器，可以做到手心咁細，電量以年計。相信係呢幾年講得好多嘅 IoT 物聯通，都會因為 4.5G NB-IoT 技術成熟，係今年內普及。
▲ 聽說不只一個網絡商，會引入 LAA/LTE-U 技術，其實係乜呢？兼容嘅手機，可以同時接收 4.5G 與 WiFi 網絡商訊號，以補不足。舉過例，若果你去到某一地方，4G 網絡太多人用而令上網速度減慢，透過 LAA/LTE-U 同時接收 WiFi，就可以把網速提升。跟現時長開 WiFi 不同時做到實時轉網，手機網絡與 WiFi 一拼使用，而中間不會斷線。
▲ 其實 Qualcomm Snapdgraon 820 CPU 嘅手機，都可以有呢個功能，但真正有手機支援，相信要係 2017 年第一季之後。