幫數碼通搶 csl. 客！HKBN 推彈性真無限數據計劃：吸引，但有無伏？

左定坤 (Cho Ting Kwan) 2017-09-19 19:49 | 數碼通

當初 HKBN 初出手機台，版主剛好 SUN Mobile 合約完結，於是就順便 Join 左 HKBN $98 5GB 42M 的 Corp Plan，可惜 Join 了之後，就發現今次不妙了：上網速度並沒有大問題，最主要問題是 Wi-Fi 熱點太少，並不像 SUN Mobile 果陣咁，有咁多「CSL」Wi-Fi。當 Wi-Fi 熱點不足的時候，版主就發現 5GB 實在是不太夠，好容易會爆 Data 變地獄速。不過，版主收到風，HKBN 將會幫 SmarTone 搶 csl. 客，推出更有吸引力的「真無限數據 Plan」，版主聽完應該會考慮加約升級上去。到底吸引地方在於邊？又有無伏呢？睇下文啦！

HKBN 推出「彈性」真無限數據計劃

HKBN 將會在明日舉行發佈會，主要內容係乜，唔使等聽日了！版主收到風，HKBN 將會取消原來的 $248 以及 $288 Plan，並將 $218 / 12GB Plan 加價 $30，即 $248。但有個 Gimmick 位係，以往當你超出 12GB 的話，速度就會變成 128kbps，而家過左 12GB，果個月加 $80 就可以享真無限上網，即 total $328，而如果果個月唔過 12GB 的話，就只需付 $248 就可以了。另外，如果你本身係 HKBN 客戶，選用 12GB Plan 的話可以享有每月 $30 回贈，即 $298 無限數據，但要付行政費，而如果你係由 csl.、1010、123、SUN Mobile 轉台過去，就連行政費都可以慳番。

文字太複雜，下表為清晰版本：

	該月用量少於 12GB	該月用量高於 12GB
HKBN 客戶 (包括寬頻、家居電話) 登記	$218 + $18 行政費	$298 + $18 行政費
csl.、1010、123、SUN Mobile 攜號轉台	$218	$298
其他新客戶	$248 + $18	$328 + $18 行政費

有無伏點？

呢個 Plan，聽落係有啲 Gimmick，幾有彈性，高用量用家可能會用，但原本用量唔係太高的話，就未必適合這個 Plan。每個月你可以肯定自己用唔超過 12GB，都無問題，但如果你突然有個月一唔小心用超過 12GB 的話，即使只是超過 1MB，你都要強制性加 $80 自動升級無限數據，呢點就似乎有少少伏了......當然你亦可以用手機內置的限制每月數據用量功能，控制自己的用量，一到差不多 12GB 就停，咁就可以減低無啦啦俾多左錢嘅情況。如果 HKBN 真係可以俾我加約升級上去，版主我應該都會考慮升級，明日版主就會直接打電話上 Hotline 問～你又對呢個 Plan 有沒有興趣呢？而家已經有 5 個網絡商推出真無限數據計劃，HKBN 又係唔係暫時最吸引的網絡商呢？留言討論下啦！