抵玩過 Sony、LG!原生 Android + 二千一像素!黑苺 Dtek60 開箱評測

左定坤 (Cho Ting Kwan) 2016-11-18 16:54 | Blackberry
不嬲講到系統安全、穩定的手機,十個有八個網友都會覺得,應該非 iPhone 莫屬。的而且確,版主自己都有用 iPhone,某程度上又真係穩定不少嘅。不過,似乎有廠商認為,自己的產品,先至係全世界最安全、最穩定的手機。有趣的是,這款「新產品」已經在大舖有售,但該廠商今日才召開記者會,不過這都不是重點。重點是版主「幾經辛苦」終於借得這部手機,可以為大家進行開箱評測。佢就係 BlackBerry Dtek60,到底這部四千鬆啲,有原生 Android 系統,又有雙喇叭的 Android 手機,可以有幾勁?有能唔能夠成為你的選擇呢?睇下文啦!

Dtek60(Facebook).jpg

開箱!四千左右有原生系統 + 雙喇叭!
早前已經有同大家分享過,BlackBerry Dtek60 在 11 月 10 日已經正式上市,建議零售價為 $4488,大舖仲有得「即減 $300」,賣 $4198,呢個價錢其實算唔算吸引呢?版主覺得係算嘅,以 S820 處理器手機來說,開價四千二其實算係相對平價。不過知道佢賣幾錢,首先都要知道一下,呢部手機到底靚唔靚仔!從正面來看,其實同佢之前部 Dtek50 有點相似,但一翻轉背面,就完全不一樣。機背採用了玻璃設計,會見到有個好突出的相機,而下方會見到有指紋辨識。雖然鏡頭係突了一點,不過同 Dtek50 相比,造工上實在是高級了不少。最重要是,佢係運行原生 Android 系統!講多無謂,先睇版主開箱同實機相片最實際!

IMG_1736.JPG
▲ 開箱!呢個就係 BlackBerry Dtek60 的包裝盒。成個設計根本就同 Dtek50 一模一樣咁滯,不同的只是將「50」改為「60」。

IMG_1737.JPG
▲ 打開個盒,會見到部 Dtek60。

IMG_1738.JPG
▲ 而手機底部會有其他配件,版主拎哂出黎俾大家睇,包裝盒入面會跟乜嘢配件。咁可以見到會有耳機、說明書、火牛以及 USB 線啦 (其實仲有一枝 SIM 卡針)!

IMG_1740.JPG
▲ 個火牛最大輸出為 9.0V / 1.67A,即係大約有 15W 的充電功率吧!

IMG_1734.JPG
▲ Dtek60 採用了 5.5 吋屏幕,算唔算大呢?一般啦,正正常常咁囉,不過因為佢解像度有 2560 x 1440,亦即係 2K,用來睇片、打機時,視覺上的感覺應該會相當不錯!

IMG_1723.JPG
▲ 屏幕上方可以見到有個 800 萬像素的前置鏡頭以及感應器,而手機最上位置,會見到有個喇叭。

IMG_1727.JPG
▲ 呢部 Dtek60 係有雙喇叭嘅,另一個喇叭設於手機的最下方。

IMG_1715.JPG
▲ 同 Dtek50 不同的是,今次 Dtek60 機背用上了玻璃面設計,版主個人就比較喜歡這種材質,好明顯會見到反哂光。

IMG_1724.JPG
▲ Dtek60 用上了 2100 萬像素的主鏡頭,而下方則有指紋辨識器。而呢部 Dtek60,應該會是 BlackBerry 首部有指紋解鎖的智能手機。

IMG_1717.JPG
▲ 右側會見到有音量鍵,下面圓形果粒掣,版主成日都會誤當佢係開關鍵,實情並不是,佢係一粒「便利鍵」,你可以自定義你想 set 佢做邊個功能的快捷鍵,例如「開啟 XXXX 應用程式」、「快速撥號」等等。

IMG_1718.JPG
▲ 至於左側見到會有開關鍵 (其實呢個設計我覺得有點難理解,根本就唔就手......)。而開關鍵下方,會見到有 SIM 卡插槽。

IMG_1719.JPG
▲ 頂部會設有 3.5mm 耳機孔。

IMG_1721.JPG
▲ 而底部則有 USB Type-C 插槽。

IMG_1725.JPG
▲ Dtek60 機身尺寸為 153.9 x 75.4 x 7 mm,算係非常纖薄的,而機身重量為 165g,拎上手並不會覺得太重。

平價 S820 手機,跑分軟件效能速試!
BlackBerry Dtek60 配備了 Qualcomm Snapdragon 820 處理器,雖然而家 11 月仲出 S820 好似有點遲,不過 anyway,其實 S820 又唔係話差嘅。另外,Dtek60 亦都內置了 4GB RAM 以及 32GB ROM,4GB RAM 對我來說,係夠用的,無乜大必要要用到 6GB,不過 32GB 儲存容量,就似乎係少了一點,好在有得插 microSD 卡,叫做可以搭救一下。為左了解一下,呢部 Dtek60 同其他 S820 手機相比,效能相差幾多,版主就利用了一系列的跑分軟件,睇下佢同其他同級手機有無得揮。

Screen Shot 2016-11-18 at 3.51.29 PM.png
▲ 配備了 Qualcomm S820 處理器 + 4GB RAM + 32GB ROM 的 Dtek60,安兔兔跑分有 140556 分,相比三星 Note7 高出 3 位,僅次於配備 S821 處理器的小米 5s 以及小米 5s Plus。

15152478_345868612438618_563510317_o.png
▲ Basemark ES 2.0 Taiji Free 是用來測試手機玩 3D 遊戲時的效能,60 分為滿分,得出 59.65 這個分數,表示玩 3D 遊戲時理論上會很順暢。

Screen Shot 2016-11-18 at 3.54.39 PM.png
▲ Vellamo 測試「瀏覽器」、「金屬」、「多核」三部份,睇瀏覽器部份,雖然唔及上次版主試華為 Mate 9 果陣的分數咁高,不過呢個分數還是不錯的,用 Google Chrome 上網體驗相信會很順暢。至於金屬部份,Dtek60 則比 Mate 9 高分; 而金屬同多核都有三千幾分,代表手機整體效能都很好。

預載 Dtek by BlackBerry 應用程式,改善安全?
手機安全呢家嘢,好多人口中就識講安全安全,但實際有幾多個真係會好 care?版主覺得真正着緊的並不多,不過,既然 BlackBerry 強調,Dtek60 係全世界最安全嘅手機,咁到底佢手機上有啲乜嘢,可以加強 Dtek60 的安全性呢?在記者會上,BlackBerry 介紹過一款預載在 Dtek60 上的軟件 -「Dtek by BlackBerry」,佢可以幫助你改善手機的安全性設定,而且仲有一樣算係幾有用嘅功能,就係可以話你知,到底某某軟件幾時曾經存取過你手機的資訊。嗯,算是幾好,但有幾多人 care 呢?

Screen Shot 2016-11-18 at 4.22.58 PM.png
▲ 預載「Dtek by BlackBerry」應用程式,佢可以檢測到你手機目前的安全狀態,並會話你知,應該點樣做先可以改善到安全問題。而在「應用程式與權根」選項中,你亦可以見到,到底你下載的軟件,曾經幾多次存取過你的地點、相機、聯絡人等資訊,另外你亦可以設定,當軟件存取你的資料時,會發個通知提示用家。

2100 萬像素,挑戰 Sony?BlackBerry Dtek60 相機試拍
相機部份,BlackBerry Dtek60 配備了 2100 萬像素主鏡頭,採用了六片式相機模組,最大光圈為 F2.0,並支持四倍電子變焦以及防震功能,咁實際影出黎效果如何呢?以下試相均使用了「自動模式」拍攝,當然,Dtek 亦有手動模式,可以調校白平衡、快門速度、ISO、曝光等設定。即刻睇下啦!

IMG_20161118_1432189.jpg  IMG_20161118_1432411.jpg

IMG_20161118_1432577.jpg  IMG_20161118_1433158.jpg

IMG_20161118_1433306.jpg  IMG_20161118_1434063.jpg
▲ 從屏幕上看,覺得相片好像有點暗,不過放到電腦上看時,感覺還可以吧。成像出黎幾細緻,另外因為手機有手動模式,如果你覺得自動模式做唔到你想要的效果,你可以用手動模式自行調整 ISO、快門速度等設定。

IMG_20161118_1645317.jpg  IMG_20161118_1646215.jpg
▲ 街外下着雨,天色有點昏暗,但拍出來的成像,並沒有覺得特別的暗。不知網友覺得,Dtek60 的成像質素如何呢?

小結
初步試玩過這部 Dtek60,雖然同是代工生產的手機,但整體外型看來,比 Dtek50 美觀得多。效能方面就不多說,跑分成績是一個合理的分數,Dtek60 最重要的優點是,運行原生 Android 系統,並且擁有號稱強大的安全級數,內置的「Dtek by BlackBerry」應用程式,能夠更有效保護手機。至於試相方面,在屏幕上看會有點兒偏暗,但放到電腦上看,表現又不算是太差,成像細緻度都算係交足功課,可媲美 Sony、LG 手機。唔知網友對呢部 Dtek60 又會唔會感興趣呢?

BlackBerry Dtek60 在文章發表時,大舖賣價為 $4198,按這裡有詳細規格及最新賣價

最新新聞