$288 歐美七國 14 日無限上網！版主英國試玩 3 HK 漫遊數據卡

Lawrence 2015-04-13 16:15 | 網絡消息

相信大家都明白，根據 ePrice 不成文傳統，每逢過時過節又或者版主們因事要到外地，有一件事真係唔少得嘅，就係 Sim 卡試用分享！咁話晒今次小弟第一次去外地參與發佈會，當然都要寫寫 sim 卡試用分享啦！今次版主所用的 sim 卡其實之前版主 Keith 都有介紹過，可以係加拿大及歐洲六個國家（包括版主今次去的英國），十四天無限上網的 3 香港漫遊數據卡！呢張卡係深水埗鴨寮街 SIM 檔都買到，目前價錢大約係 $288 蚊，平均計返每日都係廿蚊多啲都好難話唔抵玩。不過有時 sim 卡好不好用真係要用過先知，今次版主去華為 P8 的發佈會就會日日用呢張卡，一齊留意呢張卡有無伏同好唔好用啦！

平均廿蚊無限上網！ 3 香港漫遊數據卡簡單介紹

先簡介一下呢張 3 仔 sim 。呢張 3 仔 sim 卡英國、瑞典、意大利、丹麥、奧地利、愛爾蘭及加拿大合共七國都岩用。除左適用地方夠多之外，呢張卡勝包埋係香港上網，所以上機前已可以輕鬆用到。（雖然係香港啟用會照計日數，但亦建議大家係離港前就啟用 sim 卡）呢張 sim 卡另外一個要注意的地方就係在「條款及細則」內列明不適用於 tethering 服務，呢樣版主當然係到英國時會同大家試啦！（如果用不到對於出外工作的朋友來講問題都幾大）。雖然版主而家仲未出發，但就記得兩年多前到英國時係當地都係用 3 仔的 7 日（日子不太 sure ）無限 3G 上網 prepaid sim卡。以當時只得 3G 來講版主都成功地用到十幾 GB ，感覺就係終於係誠哥手上賺到少少甜頭了！


▲ 呢張卡有一樣抵讚的地方就係有 nano sim 尺吋，雖然而家不少旗艦已經用緊 nano sim （反而 micro sim係少數，只係得 Galaxy note 4 同埋 Zenfone 2 用緊）但係不是所有 prepaid sim 都有 nano sim 尺吋可用的，好似同係 3 仔推出的 3 日澳門 8GB 上網卡就無了。

係香港啟用呢張 sim 卡的方法好簡單，說明書上寫住打出第一個電話或者發送一個 sms 已經可以啟用，之後就會收到一個確認 sms 。（但版主試用時一開機就啟用了，如果在外地啟用的朋友就可以打 ##197*0# 再撥號來啟用電話卡，再打 *127*314# 之後撥號啟用 14 日上網）。好啦，版主係香港的分享就暫時係咁多，始終在英國的試用才是戲玉啊！版主到埗後同返來時都會 update 最新的使用體驗，有意去歐洲的朋友就要留意啦！


▲ 版主用 HTC 手機可以即時啟動到電話卡，再輸入 *127*314# 再撥號就可以啟用埋 14 天無限上網了。係香港時，版主試用 tethering 服務係成功的。（但不知甚麼原因，用 Sony 同 Samsung 兩個牌子的手機係 detect 不到電話卡的， S6 Edge 因為呢個原因連 Apn 都打不到，但時間關係唯有返來再詳試了。）