一次過收兩個台，同時兼容 WiFi 網絡
Google Project Fi 其實係一個意念上好創新嘅計劃！Google 打算係不同地方，透過租用一個以上嘅手機網絡商，再聯合當地嘅 WiFi 網絡，做出一個無論係上網定話音都係最好質素嘅手機網絡。而收費方面，則以簡單為賣點，用幾多，俾幾多，唔駛簽合約，服務計劃包括了全球語音、短訊及數據漫遊。Project Fi 第一個推出嘅地方係美國。Google 租用了 T-Mobile 及 Sprint 兩個網絡商嘅 3G 與 4G LTE 訊號，用家上了 Project Fi 呢個台，可以一部手機 (暫時只有 Nexus 6)，系統幫你揀 T-Mobile 與 Sprint 兩個台最強嘅訊號。為幫助減輕網絡商嘅負何，Project Fi 亦包括了美國近百萬個 WiFi 熱點，用家可以選擇免費用 WiFi 上網。用上全新 WiFi Calling 技術，用家更可以在 WiFi 網絡，打出打入手機嘅電話號碼，甚至 send 收 SMS。
玩質素，唔係鬥平價
Google Project Fi 嘅想法，係咪好有趣？你又想唔想 Google 將 Project Fi 引入香港？不如睇埋收費再講。Google Project Fi 用一個價，US$20 (約 HK$156) 全包當地話音及 SMS 短訊，無限任打任 Send、任聽任收，兼無合約。上網呢？用幾多俾幾多，收費為每 1GB 收你 US$10，大約 HK$78 蚊 1GB。簡單來說，無限通話加 1GB 數據用量，就要 HK$234，呢個價錢，拍得住 csl. 1010 嘅收費，絕對唔可以用平來形容。由於佢係每 GB US$10 加上去，用到 10GB 用量，收費高達 US$120，即係約 HK$938，香港用家眼光，天價呀。
不過咁，Project Fi 用家可以享受出外漫遊免費任 Send 任收 SMS，數據收費亦會依照本來美國收費計算，就好似中國移動香港 CMHK 中港共用數據計劃，Project Fi 用家，係美國以外嘅數據用量，照以美國本土計算。誠然，版主未能用抵字來形容，因為美國以外，全面限速 3G 網絡 256kbps，比起香港嘅 128kbps 地獄好少少。
若果你仲對 Project Fi 有興趣，其實你要係美國人先可以登記。登記方法，跟 Google 產品一樣，你 Send Request 俾佢，再等佢地接納。此外，暫時 Project Fi 只對應 Nexus 6 呢部手機。
消息來源：Project Fi