來自一間有 4G 牌照嘅公司
在沒有特別宣傳下，有網友發現了以繁體中文為語言，以 Vave 為品牌嘅儲值 SIM 卡。亮點係 $238 卡價，包 30 日本地無限上網，仲寫明係用 4G LTE。另一款 $298 更包埋無限通話及 SMS 短訊。今時今日，呢個價好吸引! 好眼嘅網友，更發現發行呢張卡係一間叫「世紀互聯 21vianet」公司，仲記得呢間公司，本身擁有 30MHz 容量嘅 TD-LTE Band 40 (2300) 頻譜，可以提供 4G LTE 上網服務，令人想起，係咪終於有新台以儲值卡方式加入競爭。版主首先係儲值卡聖地深水埗桂林街一帶行過，無 SIM 檔賣緊呢隻品牌嘅 SIM 卡。版主亦揾到有人聽嘅「世紀互聯 21vianet」聯絡人，佢首先講明，呢張卡佢地暫時無公開發售，只給予合作夥伴。版主再追問合作夥伴嘅聯絡方式，當時人又拒絕透露，仲掉轉問我點知有呢張卡存在，感覺超奇怪。
版主得再問行內人，呢張 Vave 儲值卡原來有段故。發行商的確係呢間，有 TD-LTE Band 40 (2300) 商業牌照嘅「世紀互聯 21vianet」，不過，佢地仲未係香港起網絡，而 Vave 儲值卡用嘅手機網絡，居然係 csl。呢位行內人叫版主唔好對呢款卡嘅無限上網有太大嘅希望，原因我知，但不便透露，只可以講，其實 Vave 儲值卡，針對來港遊客，特別係逗留時間唔長，又想平價用無限 4G 上網嘅人。你都知啦，無限上網有時係心理問題，用得開心 D ，但又唔代表你一定用得好多。另外，網友都有指出，儲值卡及 Vave 網站裡面提及嘅地址，都係郵箱號嗎，而版主都打過儲值卡列出來嘅客戶熱線，都係無真人回應嘅選項，客戶服務方面有點危。最重要係，我想試下速度，都唔知點樣入手。哈哈!
(21／8 早上更新：今早世紀互聯已有人跟版主聯絡，表示大約下月 (2015 年 9 月份會公開發售此卡）
2017 搶攻村屋市場
講開呢間「世紀互聯 21vianet」，原來也有新消息。上文講過，佢地係有 TD LTE Band 40 (2300) 30Mhz 嘅容量可以推出 4G LTE 上網服務，但跟據政府通訊辦資料，佢地攞嘅係無線固網牌照，唔係其他網絡商嘅流動網絡牌照，並以商業服務為主。不過咁，佢地由攞牌到今日，連網都未起，更不要說推出服務。而係七月份，佢地已入紙通訊辦改 Plan。新建網計劃，會係 2017 年 3 月 29 日或之前，推出以鄉郊村屋為服務對像嘅無線固網服務。村屋一向被 PCCW 落後嘅 6MB-8MB ADSL 電話線上網服務獨霸，收費比起市區樓宇可以貴一倍，但速度慢十幾倍，照「世紀互聯 21vianet」對香港政府作出的承諾，佢地須係 2017 年 3 月 29 日或之前，向最少 3000 間村屋提供網絡及服務覆蓋，並係 2018 年 3 月 29 日或之前，向累計最少 4000 間村屋提供網絡及服務覆蓋。若果「世紀互聯 21vianet」預期推出服務，的確可以為用家帶來更多選擇，我地又睇睇，呢張期票，最後又能否呈現得到。
▲ 報導及圖片，來自經濟日報