HTC M7 設計師出走大作:Nextbit Robin 二千幾蚊你買唔買?
|
網絡消息
▲ 圖片中的人兄,就係有份參予 HTC One M7 與 M8 設計嘅 Scott Croyle。
我哋平時睇機除左睇佢功能之外,最重要係佢個規格同價錢,呢部方形嘅 Robin 手機,頭 1000 位資助,可以以大約港幣 $2420的價錢 (連運費),投得這部手機,都唔係好貴,就可以享用到 Qualcomm Snapdragon 808 SoC、3GB RAM 、5.2 吋 1080p 高清屏幕,仲有基本功能如 NFC、指紋感應器都一應俱全。由於這部手機大受歡迎,剛上架就極速全部被人認購哂。
▲ Robin 呢款手機的基本配置。
呢部機最大的賣點就係佢嘅免費 100GB 雲端儲存,Nextbit 表示無人會好似佢地咁造部咁嘅手機,可能就係Google 同 HTC 都唔 buy 佢哋條點子,所以佢先叫人集資支持佢哋自己出。Nextbit 聲稱,只要有 Robin 呢部手機,你就可以唔洗擔心容量不足的問題,因為佢想話俾人知,雲端可以成為手機的本體。
▲ 背後有雲端的圖示。
當你電話容量不足的時候,Robin 可以自動幫你探測你手機裏面有咩嘢文件係比較少用,然後就會幫你將果啲少用嘅文件上傳上雲端,唔洗你自己左刪右刪,咁樣你嘅手機就可以任何時候都可以有足夠的空間,唔會出現容量不足嘅問題。
如果裝置幫你刪左啲程式,咁係主界面上嘅圖示就會變暗,如果你想用番,只需要按一下變暗左嘅圖示,佢就會即刻幫你係雲端 download 番落黎,睇落都幾方便咁!
▲ 便宜的價錢已極速被認購清光,只能以 $2860 的價錢認購。
雖然而家以 $2420 呢個價錢認購唔到呢部機,但如果你真係好想買部機番去玩下嘅話,你可以以貴啲嘅價錢認購佢番黎,連埋運費大約港幣 $2860 左右,不過就要等到 2016 年 2 月先出到貨。嗯嗯,有心唔怕遲,欲購從速,快啲上 Kickstarter 度認購啦!
來源:Engadget、CNet