根據版主收到的消息，呢部有成 13000mAh 怪獸級電池的手機，預計將會喺 6 月 5 日上市，建議零售價為 $2580。而到底呢部手機又有乜嘢特別呢？其實版主都已經上手過呢部手機，老實講如果帶出街用，我會覺得好型，不過始終有成 13000mAh 電咁誇張，一定唔會輕得去邊。6 吋 FHD+ 芒，但重量有成 330g，話帶舊磚頭出街，也不為過。機身整體設計有別於一般的手機，有點像 CAT 那種三防手機的設計，型唔型就睇你點睇，反正我自己就會覺得幾型。
規格部份都不容忽視，除了處理器 —— 用上了 MTK MT6763 處理器 (即 Helio P23)，見到 MTK 已經大打折扣。其他配置有 6GB RAM + 64GB ROM，支持最高 256GB microSD 擴充，電量 13000mAh 頭先講咗啦，不過唔講唔知佢仲支持 Super Fast Charge 快充技術，最高支持 5V / 5A 共 25W 的輸出，同時亦支持現今流行的無線充電功能，仲可以反向幫其他裝置充電添。不過，跟機就無跟到無線充電器，需要自行另外購買。相機方面，呢部手機具有 21MP + 5MP 雙主鏡頭，用上了 Sony IMX230 F1.8 光圈感光元件，而前置相機同樣有雙鏡設計，兩個鏡頭分別為 8MP 以及 5MP。還有更多的驚喜，包括用上原生 Android，運行 Android 8.1 Oreo 作業系統等等。
講咗咁耐，唔知網友估唔估到，版主講的呢部係乜嘢手機？而如果呢部手機只係賣 $2580，網友又覺得玩唔玩得過呢？留言討論下啦！