香港寬頻殺入百老匯!買手機送一年 5GB 全球漫遊數據
|
網絡消息
版主行場時留意到,Global Phone 現身於百老匯。跟 HKTVmall 賣價一樣,賣價都係 $2688。買機會送 5GB 環球數據服務 (365 日內使用)、myTV SUPER 應用程式基本版 24 個月以及 TVB Anywhere 應用程式 Bee 計劃 24 個月。直接買機,好處係唔使焗住簽長約囉,不過,其實有幾多人會買呢部 Global Phone 呢?版主 so far 好似無見過有人用。而家殺入百老匯賣,網友又點睇呢?
Global Phone,佢嘅作用主要就係俾人當 Wi-Fi 蛋用,內置 CloudSIM 讓用家可以去到邊都能夠唔使換卡,使用其漫遊數據。你話點解唔索性買部 Wi-Fi 蛋?講到 Global Phone 好處,真係算係唔使下下都要去鴨記買 SIM,方便少少咁囉,唔夠數據,可以透過 Connect App 嘅商店內增值。問題係,你咪又係一樣要帶多部電話去旅行,而且重點是返大陸的話用唔到 WhatsApp、Facebook、Google,呢個係一個大問題。
好奇一問,而家百老匯都有得買,好似買嘅渠道容易咗,但有幾多網友會 buy 佢呢?留言講下啦!