十一月小心! 首個出賣朋友 App : Peeple 人際關係大破壞
|
Apps
預計大約 11 月左右,將會有一隻叫做 Peeple 嘅 App 推出,但喺未推出之前,呢隻 App 已經俾好多網民「怒插」! 你可能唔知道 Peeple 係咩野,Peeple 就好似 OpenRice 咁,可以俾你評分同埋留下評語,不過對象就唔係餐廳,而係你身邊嘅朋友。只要你有你朋友嘅電話,就可以喺 Peeple 上為你嘅朋友評分,甚至可以留下你對你朋友嘅評語。如果你咁唔好彩俾你朋友「出賣」左,咁你就無辦法刪除你喺 Peeple 上嘅檔案,就算你投訴都無用,除非發生好嚴重嘅「霸凌事件」。
▲ 網民怒稱 Peeple 呢個概念實在太可怕了!
▲ 你可以為你嘅朋友、同學、下屬進行評分及留下評語,仲要係人都睇到,仲有咩私隱可言呢?
咁當然,Peeple 呢隻 App 都有佢一套嘅審核機制,首先你一定要有 Facebook 帳號,仲要年滿 21 歲,而且你要有你朋友嘅電話號碼,咁你先可以對你嘅朋友作出評語。其次,喺你留下評語之前,你要選擇你同你朋友係咩野關係,以確保你同你朋友一定係互相認識嘅。但係,仍然無辦法排除會出現有「朋友」惡性攻擊嘅情況。
▲ 一定要互相認識,先可以留下評語。
不過咁,唯一一樣比較好少少嘅係,如果你朋友留好評嘅話,咁個評語就會直接 post 上你嘅個人頁面。相反地,如果你朋友留嘅係負評,Peeple 就會喺 48 小時內審核一下呢個評語有無涉及到歧視嘅問題,如果無 Peeple 就會將個負評 Send 俾你,同你確認一下你朋友所講嘅野係咪真,如果你 Confirm 左係真或者無異議嘅話,咁個評語先至會 post 上你嘅個人頁面,咁你係唔係都話唔係真嘅話,咁咪唔會影響到囉?
未必! 如果人地專登俾「 5 星」你,但留下負面嘅評語,咁呢樣就未必係 Peeple 可以控制到嘅問題。如果真係咁嘅話,呢個 App 對於正常人黎講絕對係一個惡夢! 唔知大家對於呢隻 App 有啲咩野睇法呢? 版主覺得呢,如果真係推出左呢隻 App,喺人只要有你電話就可以喺 Peeple 度「擺你上枱」,咁仲有咩野私隱可言? 你又點睇呢?
來源:abcNews | BBCNews | BusinessNext 數位時代