Google 放寬 apk 上傳限制抗 iOS! 未來 Android Apps 或更強大!

左定坤 (Cho Ting Kwan) 2015-09-30 21:45 | Apps
喺開發者上傳文件大小嘅限制呢方面,Apple 比 Google 更為寬鬆,就算 upload 到 200 MB 以上嘅 iOS 文件上 iTunes 都無問題,所以開發者能夠有更大的發揮空間去設計 iOS apps,大部份 iOS 的軟件都做得幾出色。唔知係咪 Google 有意諗住急起直追, 尋日對 Play 商店作出一個重大嘅更新,放寬開發者上傳 apk 文件到 Play Store 嘅限制。呢個更新關唔關你事呢? 版主同你講,絕對關你事,而且可能會對你有好大影響!  版主而家即刻同你講下!

//timgm.eprice.com.hk/hk/mobile/img/2015-09/30/203433/prince1025_1_4430_1a3a68307f704a9a9b05cf72f9450225.jpg

以前 Google 限制左開發者最多只能上傳 50 MB 的 apk 文件到 Google Play,而家更新左之後,開發者可以上傳最多 100 MB 嘅 apk 文件上 Google Play,比原本嘅多左一倍。咁意味左啲咩呢?對於用家黎講,你可能會覺得無咩特別。但對於開發者黎講,呢 100 MB 可以俾佢地又更多嘅空間去制作更出色嘅 Apps。

據 Google 稱,放寬限制可以幫助開發者制作出更加強大嘅 Apps,亦可以有助開發者在原有嘅 Apps 上加入更豐富的內容。例如 Facebook 咁,最新嘅 Facebook update 係需要 44.64 MB,如果開發者想再加多幾樣新功能,就可能會超過左 50 MB 嘅限制,咁基於呢 50 MB 嘅限制,導致 Facebook 好難有更大嘅突破。

而家更新左之後,開發者能夠設計更加複雜嘅軟件,而你又可以利用你嘅智能手機,做到更加多目前做唔到嘅野,對大家黎講其實都係有利嘅。不過對於手機記憶體比較少嘅用家,就可能會係一個壞消息。但係講到尾,開發者可以做到更出色嘅軟件,最後得益嘅都係使用者。所以你話,呢個更新關唔關你事呢?

最新新聞