必玩 Game 001: 超級無敵大電視
相信無論你係大人細路，就算自己無玩過，應該都有睇過獎門人玩「超級無敵大電視」。透過手機 App，而家你都可以同親朋戚友，組隊挑機，大玩「超級無敵大電視」。遊戲玩法好簡單，分開兩隊，每隊派出一個負責估手機顯示的詞語，然後其他隊友輪流利用動作 / 口述俾提示，提示當然唔可以包含詞語中的任何一個字吧，如果唔係該局就會作廢。估中最多果隊，就為勝出者。當然，遊戲玩法就人定架啫，如果空間夠大，你亦可以好似大台綜藝節目《我愛香港》中的「口噏噏當秘笈」咁，估果個戴住隔音耳機，隊友大聲讀出詞語，俾估果個猜，或者咁樣成個遊戲仲會更有趣呢！
▲ 免費版只有「多才多藝 I」、「地方名稱」、「動物王國」三個類別，要俾 $38 先可以解鎖全部類別。不過咁，你亦都可以自製「私家卡」，自己設計一組詞語俾你的親朋戚友估。
App 下載資訊
◎ App 名稱：超級無敵大電視 Super! Charades
◎ 系統需求：Android 3.0 或以上 / iOS 7.0 或以上
◎ 下載方式：免費 Google Play / iTunes (香港帳號)
玩哂啲題目，你亦可以下載《Party Guess》，遊戲玩法大致同《超級無敵大電視 Super! Charades》相同......
App 下載資訊
◎ App 名稱：Party Guess
◎ 系統需求：Android 2.3 或以上 / iOS 6.0 或以上
◎ 下載方式：免費 Google Play / iTunes (香港帳號)
必玩 Game 002: 真心話大冒險
記得讀書的時候跟同學去 Camp，好興會玩「真心話大冒險」遊戲，亦即係 Truth or Dare，遊戲玩法就係，成班人打圈圍住個樽，然後搵人負責轉樽，個樽指向邊個，就要問邊個問題或者叫佢做指定動作 (視乎被指中的選「真心話」還是「大冒險」)。而家呢款咁經典的遊戲，就算無樽都玩到，有部手機就得，仲唔快啲 Download 落黎，同親朋戚友一齊玩？
App 下載資訊
◎ App 名稱：真心話大冒險 (完全中文版)
◎ 系統需求：Android 3.0 或以上
◎ 下載方式：免費 Google Play
必玩 Game 003: 平衡塔
平時同班 friend 去 Cafe 開 Party 搞聚會，有唔少人都會拎層層叠玩，雖然呢啲益智 Game 已經興左好多年，但都而家依然相當受歡迎。不過，實體層層叠麻煩地方係，倒下了又要再執番哂重新砌過，如果有虛擬層層叠，你又會唔會想玩呢？今次要介紹呢款《平衡塔》App，就只需要輪流在手機上，拔走積木再放上最頂層，輸左唔使重新砌過哂，按一個鍵就可以重頭開始，雖然會無左實體果種 feel，不過就免卻了不少麻煩。
App 下載資訊
◎ App 名稱：平衡塔
◎ 系統需求：Android 2.3 或以上
◎ 下載方式：免費 Google Play
必玩 Game 004: Dark Killer (殺手 / 天黑請閉眼)
戴定頭盔先，其實呢隻 Game 已經好舊，不過版主成日都覺得，如果好玩的話，又唔怕舊嘅！相信有不少網友 (特別是比較年輕一輩)，都試過有咁嘅經歷，當一班朋友聚埋一齊，手頭上有副啤牌，唔知玩咩的時候，總會有人提出玩「狼人」。而家就算手頭上無啤牌，都唔緊要，有手機都可以玩到類似嘅遊戲。佢就係《Dark Killer》，玩法同狼人相似，一個人負責做主持人，其餘的玩家用 Wi-Fi 連接後，將會隨機擔任殺手、女巫、平民等角色，而主持人需要按照屏幕上的提示，帶領整個遊戲以及觀看玩家的動作。總言之，無論你有無玩過「狼人」，應該都唔難上手。
App 下載資訊
◎ App 名稱：Dark Killer (殺手 / 天黑請閉眼)
◎ 系統需求：Android 2.3 或以上
◎ 下載方式：免費 Google Play
必玩遊戲 005: Duel Otters
如果玩呢款遊戲，我會建議用平板 / iPad 玩，原因係需要兩個人同時在一部裝置一齊玩，所以屏幕愈大，遊戲的體驗就會相對愈好。而呢隻 Game 入面有不同的小遊戲，例如排球、壘球等等，你可以同你的親朋戚友挑機，同佢哋鬥反應，鬥手眼協調。而且遊戲畫面都幾得意，加上係免費的，有興趣的話都可以下載落黎玩下！
App 下載資訊
◎ App 名稱：Dual Otters
◎ 系統需求：Android 2.3 或以上 / iOS 6.0 或以上
◎ 下載方式：免費 Google Play / iTunes
假如上面無你想玩的遊戲，唔緊要，你可以參考番近呢兩年 ePrice.HK 介紹過的 Game！都係果句，Game 唔怕舊，最緊要好玩！
2016: 【新年精選】單機多人齊齊玩! 去拜年識玩，一定要玩呢五隻 Game!
最後，祝各位網友恭喜發財，新年快樂！