特急開箱
玩過 PUBG MOBILE 的朋友都知道，每隊可以有四條友，我一次過係「偉大強國的寶貝店」特急購入 4 套「食雞神器」。 神器有分幾個版本，滿地都係「黑色導電棉」，高級少少係「靜電膠 + 紫銅」，聲稱最高級的係「機械式聯動觸控」。 本 YK 剔除最高級的版本，因為肯肯定容易壞，寧願選擇所謂次一等的型號。
▲ 原本急不及待係大街當眾開箱，點知個箱包得太密，只好歸家慢慢搞。
▲ 一開箱有四件，自然係比自己隊友用啦！寫明「五代 吃雞神器 專利產品 大吉大利 晚上吃雞」，呢度咁多個中文字，暫時無一個字我信得過～
▲ 我買的版本係透明塑膠 + 導電紫銅貼紙，購買時係可以選擇一對左右，或者你習慣「左青龍右滑鼠」，買一隻都得。
▲ 工作原理好簡單，紫銅貼和黑色物料都係導電，你可以視為你手指的延伸，你觸碰佢就等於觸碰手機屏幕的特定位置。
▲ 呢塊係導電膠，物料同你街邊買 10 蚊電容觸控筆頭是一樣。
▲ 市面上絕大部分手機的厚度都兼容，太厚如部分三防機就無得用；帶套手機就視乎套有幾厚，本 YK 最愛超薄 0.1 套，完美兼容「食雞神器」。 如果你喜歡「裸跑機身」，機身薄令神器鬆動的話，有一個卡扣可以頂緊手機機背。
▲ 如圖放入「食雞神器」，大約記下導電膠在屏幕上的位置。
▲ 進入 PUBG MOBILE 設定自定義操控界面，稍後影片會介紹如何運走。
▲ 保存好你的設定，然後就開始大殺四方！ 因為隊友報告話，頭幾次都好容易因為操作不適應，最終令自己死亡出局。
▲ 最終殺器完成！
實際測試影片
咁究竟實際操作如何呢？本 YK 拍左條片比大家睇，開聲有聲音導航。如果你發現聲畫不同步，是正常不過的事，因為臨時用上某大陸手機，錄製時已經有問題！
▲ 本 YK 使用的是 HTC U11，Android 玩遊戲只信任高通，仲有 Nvidia （好似係）～
結論
「食雞神器」其實原理很簡單，對於 DIY 高手來講並非難事，導電膠 + 3D 打印塑模 + 導電貼紙就可以輕鬆完成。幾十蚊貨色，對於 DIY 低手來講並非難事，送到你屋企就可以隨時開打。你肯買得差少少，十蚊都見過！ 我玩左成個星期體驗是非常好：開槍快左，移動順暢左，重點係自信心增強左～ 最後最後，千萬不要留言 / PM 問我邊度買到，我回覆唔到你架。 好喇係咁先，我翻出去玩 PUBG MOBILE，拜拜！