傳 Iron Man 限量 Galaxy S6 Edge 香港版! 賣八千,貴客先有份

Keith Yim 2015-05-27 11:20 | Samsung
尋日 Samsung 發出新聞稿,宣佈和 Marvel 合作推出 Iron Man 限量版 Galaxy S6 Edge。無論係 Samsung 手機定係 Iron Man 粉絲們,都對於呢部紅 x 金色機身,並且配有型仔同色無線充電器嘅限量版虎視眈眈。新聞稿話限量版會喺今日起在韓國開賣,6 月就喺中國大陸和香港推出,究竟賣幾錢、限量幾多部、點樣買得到,版主收到嘅風梗係要同 ePrice HK 網友們分享下。

new_Galaxy S6 edge Iron Man Limited Edition_KV1_640.jpg

版主收到嘅風,限量版暫時只會在南韓、中國大陸和香港三個地方推出,歐美未必有(外國討論區見到 Iron Man 粉絲勁葡萄)。今次限量版數量據講得 1 萬部,不過並非平均分配俾上述三個地方。韓國和中國分到幾多,版主唔清楚;不過香港只係獲分配不多於 500 部(據聞更少)。



網友肯定會話物以罕為貴,Galaxy S6 Edge Iron Man 限量版價格可能賣到天價,過萬應該冇走雞。如果版主收嘅風冇錯,Samsung 今次來一招估你唔到,限量版價錢只係比 64GB 普通版加原裝無線充電器貴少少,比 iPhone 6 Plus 128GB 貴 D 咁話(家陣 iP6 Plus 128GB 賣 HK$8088)。已經拎定銀包信用卡嘅網友冷靜返先,據講今次 Samsung HK 唔會公開發售,要買機就要等 Samsung 邀請,然後去指定地方磅水買機。至於邀請準則呢...... 版主都好想知。最後帶返個 Iron Man 頭盔先,收風嘅嘢未必完全準確,亦可能存在變數。買唔到香港版嘅網友,估計都有韓水啩。

三星香港已公佈了 Iron Man S6 Edge 香港售銷方法,按這裡知更多

最新新聞