年度旗艦鬥抵玩!三星 / LG / 華為 / 1+ 邊部最值得買?

左定坤 (Cho Ting Kwan) 2016-12-23 21:02 | Samsung
2016 終於都到尾聲了,回顧番今年出過的旗艦機,其實真係有吸引力的並不多,甚至見到有網友在 Telegram 群組度講,話想用番 2015 年的手機。係嘅,版主成日都講,最好用、最有吸引力果部機,已經停左產,剩番嘅真係無乜邊部吸引。而講到比較有話題性的手機,版主覺得有三星 S7、LG V20、華為 Mate 9 以及 OnePlus 3T,在這幾部機之中,到底網友覺得邊部機最值得入手呢?一齊睇下啦!

場料(Facebook).jpg

F1.7 光圈超強攝力!三星 S7 會是年度影相最靚手機嗎?
唔知大家覺得,三星 S7 是否能稱得上為年度影相最靚的手機呢?雖然根據某權威網站的評分,HTC 10 似乎相比 S7 還要高分,但版主個人就比較喜歡 S7 的影相表現,尤其是其 F1.7 大光圈,在昏暗的環境下,更能突顯與其他手機的差別。所以如果俾我揀,我會選 S7 為年度影相最靚的手機,唔知網友又認唔認同呢?不過一部手機影相靚與唔靚,其實不過是個人主觀意見,但我自己就覺得,咁多旗艦機之中,S7 算係幾值得入手。三星 S7 現時大舖賣價為 $4298,而細舖則再便宜 $100 左右,最新賣價約 $4180,呢個價錢其實已經企硬一段時間,不知大家覺得,S7 又值唔值呢個價呢?

15731327_366379500387529_191722685_n.jpg
▲ 三星 S7 一直都係版主個人好想玩的手機,唔計 Note7,呢部 S7 都算係一部好機,價錢企硬 $4298,又抵唔抵玩呢?

音效是重點!配搭 32bit Hi-Fi Quad DAC 的 LG V20,你又考慮嗎?
一講到 LG V20,版主會覺得佢簡直係 LG 的傳奇,近呢兩年有幾可 LG 手機,可以做到唔玩減價,玩加價呢?在普遍網友的眼中,不嬲 LG 只有跌價的份兒。當時大舖 Promotor 講到好似好多人買咁,但實際上背後加價的原因,你知我知,都係因為啲貨太少。不過推出左兩個月,大舖都仲可以 keep 住 $5398,已經係好大的「進步」,而細舖則賣約 $4880。至於 V20 有啲乜嘢吸引之處呢?除左有副屏幕之外,相信唔少人都會諗起,佢喺音效方面的強大。V20 是全球首款採用 32bi Hi-Fi Quad DAC 的智能手機,可以有效減少 50% 以上嘅失真與雜訊,同時能夠提供清晰的聽歌體驗。最重要的是,V20 係有得換電的!呢點已經贏唔少對手!

15782136_366379540387525_1821162641_n.jpg
▲ LG V20 開賣至今已經有 2 個月,中途曾經試過不減反加,而家企硬 $5398 呢個價位。

「不減」的神話!Leica 雙鏡頭、超強續航,夠屈機未?
講到真正企到超硬的,一定係講緊佢 - Mate 9 呀!由開賣至今未減過價,都係 $4780 (聽聞曾經大舖有暗價,減左 $100),諗住細舖買會平啲,但唔好意思,都係一樣 $4780。賣到咁貴,會唔會有人買呢?似乎又唔影響網友買 Mate 9 的意慾,版主身邊都有朋友,入左部 Mate 9 玩,都似乎用得好開心。有乜咁好?唔講雙唔雙鏡頭,Mate 9 影相靚係肯定的,但影相靚之餘,又有超強續航能力,用成日都基本上唔使用尿袋,確係幾唔錯。唔止,佢用上 Kirin 960 CPU,用過嘅都覺得,真係相比 S820 / S821 手機仲要快。有咁勁,個價企到再硬都值 (好似係),唔知網友又會唔會有興趣呢?

15749619_366383507053795_1941198660_n.jpg
▲ Mate 9 開賣至今都係一蚊都唔減,但好機嘅話又唔怕企硬嘅~

旗艦規格,跑分超驚人!S821 + 6GB RAM + 前後 16MP 相機!
講緊嘅係 OnePlus 3T,12 月頭果陣 64GB 已經正式抵港,第一水賣價約 $3580 左右,時隔一個月左右,呢部 OnePlus 3T 的賣價略有下調,最新水貨價約 $3180 左右,唔知呢個價錢,買部 S821 + 6GB RAM + 前後 1600 萬像素相機的 OnePlus 3T,又值唔值得呢?另外一提啦,呢部 OnePlus 3T,之前有細舖 show 過俾版主睇,安兔兔跑分可以去到 163800 分,呢個分數並唔係一般 S821 手機可以真正做到。唔知大家又對呢部機有無意見呢?

15731043_366379457054200_192280115_n.jpg
▲ OnePlus 3T 最新水貨價約為 $3180。

WhatsApp Image 2016-12-02 at 21.28.02.jpeg
▲ OnePlus 3T 跑分可以去到超過 16 萬分,而當中的 3D 效能,更有約 6 萬 2 左右的成績,相當不錯!

Samsung Galaxy S7 在文章發表時,大舖賣價為 $4298,按這裡有詳細規格及最新賣價
LG V20 在文章發表時,大舖賣價為 $5398,按這裡有詳細規格及最新賣價
Huawei Mate 9 在文章發表時,大舖賣價為 $4780,按這裡有詳細規格及最新賣價
OnePlus 3T (64GB) 在文章發表時,賣價為 $3388,按這裡有詳細規格及最新賣價

最新新聞