爆料大神大爆 S8: 外型、規格、上市日期、定價全曝光!

左定坤 (Cho Ting Kwan) 2017-01-27 12:03 | Samsung
三星 Note7 爆炸停產已經過了一段時間,而早排三星「好似」都解釋了點解會爆炸,原來係因為舊電嘅問題。咁天都光哂啦,呢個時候相信網友都會將目光,轉移至三星下一部旗艦 S8 上。有關 S8 的傳聞,其實版主虎仔都有同大家分享過,例如可能會有 S Pen定價 $6580 起等等。然後呢,咁部 S8 實際係點嘅樣呢?爆料大神 Evan Blass 又有料爆,即刻睇下文啦!

S8(Facebook).jpg

爆料大神 Evan Blass 不單止在其 Twitter 係咁發 post 講部三星 S8,更用了約七百字寫了一篇文章,詳盡地透露關於 S8 的資料。佢表示,今次推出的 S8,真係今時唔同往日,首先要講的係屏幕尺寸方面,甚至比舊有的 Note 系列還要大,一共有兩個版本,一個 5.8 吋,另一個係 6.2 吋,同樣是用上 Super AMOLED 屏幕,屏佔比有 83%,長寬比則為 16:9,並且兩個版本都會採用雙曲面設計。

galaxy_s8-930x775.jpg

至於規格方面,Evan Blass 表示視乎市場而定,有啲地方可能會用 Qualcomm S835,有啲地方則會用 10nm 的 Samsung Exynos 處理器 (實際係邊粒三星 U,佢就無講),淨係話效能方面會比現有 S7 快 11%,而圖像處理速度則快約 23%,雖然如此,續航能力依然能夠提升 20%。S8 將會改用 Type-C 充電插槽,5.8 吋版本的 S8 將會有 3000mAh 電,而 6.2 吋版本則會有 3500mAh。另外,S8 如無意外只會有 4GB RAM,儲存容量則會由 64GB 起跳 (好事呀......開機都應該仲有 4X GB 嘅),並且會有以前唔覺係特點、但而家變左特點嘅 3.5mm 耳機孔。

講埋相機,S8 將會配備 1200 萬像素主鏡頭以及 800 萬像素前置鏡頭 (比 S7 的 500 萬像素提升左少少),前後鏡頭光圈有 F1.7,當中的前置鏡頭,將會具有 Note7 上的虹膜辨識功能。另外,因為 S8 將會取消 HOME 鍵,所以指紋辨識器亦都會改在機背位置,但係就設於鏡頭旁邊,其實咁嘅設計我覺得應該好容易令人按錯。而最特別的地方是,S8 亦具有類似 Microsoft Continuum 的功能,叫 Samsung DeX,能夠將手機連接至大屏幕上,透過滑鼠同 keyboard 當電腦用。除此之外,S8 亦會有類似 Google Assistant / Apple Siri 的 Bixby 功能,並支持 Force Touch 壓力感應。

最關鍵是,到底幾時會發表呢?大神就表示,今年 S8 唔會在 MWC 上發表,而係會改為在 3 月 29 日在紐約市舉行發佈會,估計係因為汲取了 Note7 爆炸的教訓,所以預留多啲時間去為呢部 S8 進行測試吧?而定價方面,S8 將會貴過上代,5.8 吋版本建議零售價會係 799 歐元 (折合港幣約 $6619),而 6.2 吋版本則為 899 歐元 (折合港幣約 $7447),兩個版本都會在 4 月 21 日正式開賣。睇完以上一大輪 Evan Blass 關於 S8 的爆料,如果到時 S8 真係咁,網友又會唔會期待呢?

來源: VentureBeat

最新新聞