當正係 iPhone？ 百老匯連 Nokia 8110 都唔放過，入手要食炒價！

左定坤 (Cho Ting Kwan) 2018-06-22 15:11 | Nokia

早前同大家分享過，Nokia 8110 4G 正式喺香港賣街，有兩隻色可以選擇，包括有黃色同黑色。既然有「香蕉仔」嘅別稱，當然可以預測到，黃色版本嘅 8110 會相對受歡迎。然而，版主我又估唔到，網友會咁捧場，開賣無耐眨下眼就將豐澤黃色嘅 8110 掃清光。當然，貨量少係最主要嘅原因，就算係衛訊，都係得 3 間店舖有貨。但係，百老匯居然趁住咁嘅機會，將 8110 以炒價賣！連 8110 都有得炒，咩世界？睇下文啦！



昨日同相熟豐澤店員傾過，原來實體豐澤店舖淨係有賣黑色嘅 Nokia 8110 4G，而黃色淨係得網店先有，但係因為貨量極少嘅關係，好快就賣哂了。而衛訊，貨量都唔見得有好多，雖然一樣係以原價出售，但全港得 3 間指定門市有賣，包括有：

1. 將軍澳唐俊街 9 號 Pop Corn 1 樓 F72 號舖
2. 將軍澳欣景路 8 號新都城二期 UG043-045 號舖
3. 將軍澳東港城 2 樓 250 & 257B 號舖

嘩，三間舖都係將軍澳，對於好似版主住大埔嘅，除非真係對 8110 情有獨鍾，如果唔係都唔會特登去到咁遠買吧？

或者是物以罕為貴嘅關係，百老匯居然抬高個價，將 8110 以炒價去賣，黑色版本賣價為 $798，而黃色版本賣價則為 $998，價錢真係直逼水貨剛抵港時嘅賣價。成千蚊買功能手機，係咪真係值得？我唔知，亦無咁嘅興趣。不過比較有趣嘅現象，就係原來而家乜都有得炒，講緊係手機呀，仲以為淨係得 iPhone，百老匯先會有炒價，估唔到連區區一部功能手機 8110，都要唔放過。但係，喺四周圍都咁少貨嘅情況下，網友會唔會考慮食炒價呢？留言討論下啦！



Nokia 8110 4G 在文章發表時，大舖正常賣價為 $698，按這裡有詳細規格及最新賣價。