改用 Qualcomm S808 處理器？ 傳 LG 將於 4 月 28 發佈新旗艦 G4

Lawrence 2015-03-31 19:12 | LG

上星期同大家分享過一部爆料者聲稱係 LG G4 Note 但後被指係 G4 stylus 的傳聞 。雖然目前大家對 LG 下部旗艦所知仍然唔多，不過唔使等好耐就會有答案啦！今日 LG 就發送邀請函給國外媒體，宣佈將於 4 月 28 號舉行新品發佈會，主題係「See The Great, Feel The Great」。另外近日外國媒體亦爆出更多 LG G4 規格的可能性，大家真係要留意啦！
 


先講講 LG 將會舉行的發佈會。從規模來看，今次發佈會的主角應該會係 G4 啦，因為今次誇張到會係 4 月 28 日至 29 日期間於全球六個城市包括：紐約、倫敦、巴黎、首爾、新加坡以及伊斯坦堡同步舉辦新品發佈會，咁高調除左 G4 恐怕都難有其他手機有咁高重要性！另外，係邀請函上 LG 亦可能透露左 G4 的細節，上年邀請函背景就用左類似金屬髮絲紋面板的質感，而到最後 G3 亦真係使用左類金屬髮絲紋的設計。今年 LG 就選用皮革與縫線作為邀請函背景，唔知同 G4 外型設計又是否有關呢？


▲  呢個就係 GFX Benchmark 的 database 中有關 G4 的資料。

再講下最近傳聞有關 LG G4 的規格，近日 GSMArena 就提到係 GFX Benchmark 的 database 上面出現左 LG G4 (F500x) 的資料，從截圖可見 LG G4 除左會有 5.5 吋 2K 解像度屏幕之外，更重要就係處理器方面出人意料地用上 Qualcomm 的 S808 配 3GB RAM 以及 32GB 內置容量。而相機方面根據 GSMArena 的資料就係 1600 萬像素主鏡頭搭配 800 像素前鏡頭。 Qualcomm S808 處理器大家可能比較陌生，事實上同 S810 相比 S808 只係六核處理器，係效能上亦係略為遜色，如果 LG 真係在 G4 上改用 S808 處理器，唔知會否同傳聞中的 S810 過熱問題有關呢？當然，以上消息都係未經 LG 確實，而係 GFX Benchmark 上版主亦搵唔返有關 G4 的資料，大家最好都係留意 4 月 28 LG 發佈會啦！

來源：GAMArena