半年玩完? S810 旗艦大鋪唔賣,最後一水你衝唔衝?

Lawrence 2015-06-25 13:17 | LG
2015 年至今過左一半,上半年係旗艦機方面其實先岩岩出齊,不過有新機出自然就有舊機要淘汰,繼之前版主分享過的大鋪減價清 Nexus 6 之後,更加想唔到係另一部以 S810 處理器作為主打的手機都面對緊同一命運。大家又會唔會襯呢部機快將賣光時考慮入手「最後一水」呢?

S810 八核機皇現身! LG G Flex 2 抵港六字頭有交易!


第一部 S810 旗艦 G Flex 2 ,大鋪唔再入貨!

所指即將停產的旗艦其實就係以「第一部 Android S810 手機」的 LG G Flex 2 啦!呢部機可以話係最早係香港推出的旗艦,係 2 月中的時段在港正式開賣。係到港前, G Flex 2 以首部 S810 八核加上可修復背蓋作為賣點,水貨曾經一度炒到上六千頭,而行貨定價都要成 $5698 ,其實同聲勢強大的 G4 一樣啊!不過, G Flex 2 之後可以話係無以為繼,係其他 S810 旗艦推出後價錢一路跌,更加成為第一部係大鋪跌破 $4000 的旗艦。

至於大鋪唔賣一說又何來呢?版主發現近來衛訊大部份分店已經將 G Flex 2 下架,向店員查詢後就發現賣光之後
已經無再入貨,據聞係因為銷情實在麻麻所以決定唔再賣。同時版主到其他大鋪查問時,雖然仍然有貨,但係顏色方面都不齊全,唔知是否意咪著佢哋同時都清緊貨呢?係價錢方面,目前來講,不論係大部份分店已經無賣 G Flex 2 的衛訊還是其他大鋪,係價錢上都係賣緊 $3998 (除左豐澤仍未減)。

雖然 G Flex 2 暫未至於全面斷貨,不過坦白講自從呢部機跌落 $3998 呢個價位後,定位上實在有點尷尬,因為同廠的 G3 只係 $3698 就有交易。係兩部對比之下不少朋友的首選都會係 G3 ,大鋪將 G Flex 2 清貨唔賣的確係可以理解的。至於係先達場內,暫時來看 G Flex 2 係價錢上仍然未見有變動,「場內行貨」價錢仍係 $3580 左右,而水貨就係 $3080 。雖然 G Flex 2 $3998 呢個價位對不少網友來講都仍然係有點貴,但係而家看來再減的機會不大而且大鋪又就快唔賣的情況下又會否再考慮定係入手 G3 好過呢?大家不妨講講啦!

//timgm.eprice.com.hk/hk/mobile/img/2015-06/25/202484/lawrencelaw_3_4531_a91bdaeb04477c96168852a9696b9b97.jpg
▲ 係仍然有售 G Flex 2 的大鋪到,仍然可以用到 $3998 呢個價錢入手。

//timgm.eprice.com.hk/hk/mobile/img/2015-06/25/202484/lawrencelaw_3_4531_d38198714dae01227d8288d19bc36796.jpg
▲ 即使係二手價, G Flex 2 都要近三千,不算特別吸引。

在文章發佈的時侯,LG G Flex 2 賣價 $3998 ,按此看詳細規格和最新賣價。

最新新聞