Z5 Premium 水貨抵達，最多可以平千四
以推出日子來計， Sony 的 Z5 Premium 係三大旗艦之中最遲的一部，而且定價方面都係最高嘅。所以就定價計性價比係三者最低呢點相信應該無爭議。不過，遲推出唔代表跌價會慢，事實上之前同大家分享 Z5 Premium 賣價不到一星期，呢部 Sony 重頭戲價錢又有減了！大鋪方面大家都知唔會咁快減價，不過係 Sony 認可的細鋪來講， Z5 Premium 的價錢就由版主上次提到的 $5880 小減一百變成 $5780 ，比起原價平左六百左右。如果嫌 Z5 Premium 本身定價太貴，即使細鋪平 $600 都唔算抵玩的話，近日先達場內就出現左 Z5 Premium 的水貨，價錢方面當然會比起行貨更平。不過，暫時來計水貨價錢係場內差距都幾大，一般來講場內 Z5 Premium 水貨價大約 $5400 ，比起定價可以平一千，但版主就見過有個別細鋪水貨賣價只係 $4980 ！跌穿五千之餘仲要比原價平千四。由此可以見到 Z5 Premium 跌勢都幾強勁呢！
▲ Z5 Premium 可能因為開價六千四未必係人人接受到，所以細鋪行價一減再減，而家 $5780 都有交易，而水貨最平更見過 $4980 。
LG V10 行機價錢回穩，水貨價再跌
如果以網友支持度來講， LG V10 比起 Note 5 同 Z5 Premium 還要高呢點大家應該都會認同。係價錢方面，因為 V10 推出後受歡迎程度比 G4 有過之而無不及，大鋪價錢未減之餘，到左今個星期連細鋪價錢都企穩 $5080 ，看來減左 $600 之後要再大跌價都未必咁易。另外，上次同大家分享過 V10 有「後門貨」流入先達，價錢來講最平都要 $4680 左右。今個星期版主再到場內留意下 V10 賣價，發現支援中文的水機價錢同韓水相當接近，大約係 $4450 ，比起官方定價平約千二蚊。不過，如果以最新價錢來計，看來 V10 價錢未必有 Z5 Premium 咁令人驚喜呢！
▲一周 V10 快訊速遞：細鋪行價未有變動，但係場內水貨有減，中文版都係 $4450 左右，同韓水睇齊。
最早推出賣價都係最平！Note 5 可留意 64GB 版
同 Z5 Premium 以及 V10 相比， Note 5 可以話係「老一輩」，因為早左 8 月尾已經推出左。價錢方面，Note 5 過左咁耐都未見大鋪有減價，可能因為呢部機人氣在 V10 開賣之前一直高企吧。係細鋪行貨價方面， Note 5 唔係無減過，只係減得唔算多咁解。近日 Note 5 係深水埗鴨寮街細鋪賣價同之前相比都算係有變動， 32GB 價錢最平 $4850 ，比起前排平左一百蚊到，同時都係今次三大旗艦之中細銷行貨機價最便宜的一部。如果大家嫌不支援插卡的 Note 5 只得 32GB 內置容量不夠用，而家 64GB 版本 Note 5 都值得考慮下，因為價錢只係 $5650 ，比起原來定價平左七百有多！係水機價錢方面，而家來講 Note 5 都係以韓水會較為便宜，當中 32GB 版本 Note 5 價錢最平做到 $4080 ，而 64GB 版本價錢就比起原價平更多，賣價為 $4680 ，比起原價平到千七。
▲ 純粹個人意見，版主覺得 Note 5 係三部旗艦之中用得最順用的。價錢方面，細鋪行價 32GB $4850 、 64GB $5650 ；韓水 Note 5 32GB $4080 、64GB $4680 。
睇完今次三大旗艦最新行、水價錢之後，唔知大家又覺得而家係唔係值得入手的時間呢？一齊留言講講意見啦！
在文章發佈的時候， LG V10 定價 $5698，按此看詳細規格及最新賣價。
在文章發佈的時候， Sony Xperia Z5 Premium 定價 $6,398 ，按此看詳細規格及最新賣價。
在文章發佈的時侯， Samsung Galaxy Note 5 定價 $5,688 ，按此看詳細規格和最新賣價。