Samsung Note 5 、 S6 edge+ 細鋪價錢平最多！
首先講左係上月劈價戰開始之後，只係減過一次價的 Samsung 先，因為減價次數同減價幅度及唔上 Sony 同 LG ，所以以旗艦機價錢來計， Samsung 的 Note 5 以及 S6 edge+ 即使仲早過 V10 、 Z5 Premium 推出，但價錢就更加貴。所以，當細鋪今次減價之後，價錢同大鋪相距係最大的。以版主比較少提及的 S6 edge+ 為例，而家大鋪都仲做緊 $5588 ，而 csl 就賣緊 $5388 。係細鋪方面， 32GB 版的 s6 edge+ 而家賣價就只係 $5280 ，比起大鋪相差有成 $300 。比較多人用的 Galaxy Note 5 價錢都有得減，現時大鋪係「即減 $800」之下 Note 5 仲係要價 $4888 ，而 csl 淨機超激價就會平到 $100 賣 $4788 。不過，呢兩個價錢都係唔夠抵玩，在深水埗鴨寮街做緊的細鋪行貨價而家只係 $4688 左右，相比起大鋪可以平多 $200 。果然，係呢到可以見到，大鋪減得愈少嘅機款，係細鋪就有可能平到更多啦！
▲ 想入手 S6 edge+ 可以留意，而家買機係會送 Samsung 原廠無線充電板的，優惠期到 2 月 29 號。
LG V10 細鋪價錢追平 CMHK
相比起價錢較貴的 Note 5 ，有得插卡本身又有成 64GB 的 LG V10 看來有更多人喜歡。不過，可能因為 V10 係劈價後大受歡迎，原先會送的電池套裝都已經無再送。雖然在期後第二輪減價之中 V10 都只係減多一百蚊，但都已經唔夠大劈價初期抵玩。目前不論係 csl 還是大鋪，都仲係做緊 $4398 ，而 CMHK 客戶就會好啲，可以用 $4298 呢個價錢買機。不過，唔係個個人都用緊 CMHK 嘛！版主留意到，有部份細鋪係價錢上已經平過大鋪同時追上 CMHK ，賣 $4280 ，都係會送 Mon 貼、尿袋等配件。
▲ 實在失策，影相時無為意原來 Blur 左。但可以見到，同之前大鋪仲平過細鋪的情況不同，而家細鋪已經可以做到比大鋪更平的價錢了。
Sony Z5 Premium 再減 $200
最後就係在劈價戰當中減得最多的 Z5 Premium ，係之前劈價戰當中，減得最多嘅牌子就係 Sony ，好似 Xperia Z3+ 就「即減 $1700」，而係 Z5 系列當中賣價最貴的 Z5 Premium 都唔弱，已經即減左 $1600 ，由 $6398 劈到落 $4798 。過左一個月有多， Z5 Premium 係細鋪的價錢都有平。版主留意到一般係平到 $200 左右，賣 $4580 ，都算係不錯嘅。
▲ 另一方面係先達有買 Sony 行貨的細鋪，入手 Z5 Premium 反而唔多著數，但 Xperia Z5 就比大鋪平。
在文章發佈時， Samsung Galaxy Note 5 32GB 版本價錢為 $4888 ，按此看手機詳細規格及最新賣價。
在文章發佈時， Samsung Galaxy S6 edge+ 32GB 版本價錢為 $5588 ，按此看手機詳細規格及最新賣價。
在文章發佈時，Sony Xperia Z5 Premium 價錢為 HK $4798，按此看手機詳細規格及最新報價。
在文章發佈時， LG V10 賣價為 $4398，按此看手機詳細規格及最新賣價。