LG V20 殺埋身,舊旗艦逼減價?$1600 有找,入手 2K 芒防水手機

左定坤 (Cho Ting Kwan) 2016-10-21 20:12 | LG
知道 LG V20 將於 10.28 正式開賣的消息後,唔知點解版主我一點也不覺得興奮。無可否認的是,部機係吸引的,特別是音效方面的體驗,送埋隻 B&O 耳機俾你,以跟機耳機來說,聽歌確是一流。其實,$5398 呢個價錢,話貴又唔算貴嘅,但你話而家係唔係入手的好時機呢?肯定唔係。LG 旗艦出名跌價快,過多兩三個月,分分鐘已經跌到四字頭。不過既然 V20 推出了,舊旗艦無辦法下都要逼住減,都合理嘅!減左幾多呢?最平 $1600 有找,入手 2K 芒防水手機,你又有無興趣呢?睇下文啦!

場料(Facebook).jpg

執平貨!$2600 唔使入手 LG V10!
先講下舊代 V10,老老實實 V10 大舖已經減得好多,由建議零售價的 $5698,都減到而家的 $3698,足足劈左 $2000,呢個價,其實版主覺得已經值得入手,又有 2K 屏幕,又有雙屏幕、雙前置鏡頭,又有 32-bit Hi-Fi DAC 電子處理器,仲要係 4GB RAM + 64GB ROM。呢個配置來看,版主好記得,當時我係將之稱為「神機」。深水埗細舖大約平二三百蚊左右,都仲係處於三字頭的價位。不過如果唔介意水貨的話,旺角先達 $2580 有交易,你又會否考慮呢?

14794078_329846434040836_1513707272_n.jpg
▲ LG V10 大舖賣緊 $3698,而細舖則賣緊 $3398 左右。如果想平玩 V10,水貨做緊 $2580。

G4、G5 抵玩價,最平劈到一字頭!
講到 LG 旗艦手機,V10 係去年先推出的新系列,真正元老的當然係 G 系列。由 Optimus G 開始至今,轉眼間 G 系列已經來到第五代,而且 G5 在設計上更一改以往風格,不單止將音量鍵由機背搬番去側面之外,更將佢打造成一部模組化手機,可以裝上不同類型的模組,例如 CAM Plus、Hi-Fi Plus 等等。講真其實算係好玩,不過又係起步開價太貴,幸好推出約半年之後,大舖已經劈價 $1500,賣緊 $3998,而細舖價都係差不多,只係平多 $100 左右。至於水貨價,就比細舖平多 $1000 左右,最新價約 $2880。而不喜歡 G5 設計的話,不妨可以考慮上代 G4,不過不少大舖似乎已經無賣,細舖見到大約二千五左右,而水貨則 $1900 有交易。

13900482_329846524040827_914267227_n.jpg
▲ 舖頭稱佢為「平價機皇」,其實都無講錯,$1880 水貨價,抵唔抵玩呢?

$1600 有找,入手 2K 芒防水旗艦手機
相信唔少人都好奇,到底標題講的「$1600 有找入手 2K 防水手機」係指邊一部。綜觀咁多部 LG 旗艦,好似唔覺邊部有防水喎。香港版無,唔代表其他地區的版本無。$1600,講緊嘅係日水的 G3,日本叫 LG L24,抵玩過韓水之餘,仲有埋防水防塵功能,而且仲有 2K 芒,係就係舊了一點,但係如果當後備機/睇片用,又可以係一個選擇。順帶一提,G3 基本上在大、細舖已下架,大舖最後賣價為 $1880,有心想買的話,係有機會搵到 Display 機的,但香港版就無防水,千祈唔好搞錯。網友又覺得,呢個價抵唔抵玩呢?

14800988_329846624040817_1217983746_n.jpg
▲ 在大舖、細舖都幾乎找不到的時候,$1550 入手 LG G3 日水,有 2K 芒 + 防水,會唔會考慮下當後備機呢?

LG V10 在文章發表時,大舖賣價為 $3698,按這裡有詳細規格及最新賣價
LG G5 在文章發表時,大舖賣價為 $3998,按這裡有詳細規格及最新賣價
LG G4 在文章發表時,大舖已下架,按這裡有詳細規格及最新賣價
LG G3 在文章發表時,大舖已下架,按這裡有詳細規格及最新賣價

最新新聞