模組手機清貨大平賣?LG、Moto 旗艦減價,邊部抵玩?
|
LG
LG G5 網絡商淨機價清貨減價,平過大舖!
LG 旗艦不嬲都係跌價快,但今年情況似乎有啲唔同左,就好似 V20 咁,居然不減反增,雖然亦都可能係缺貨影響到,不過第二批貨番左之後,大舖價都只係有少許的調整,去番 $5598 的價位。而且問過大舖店員,LG V20 甚至相比對手如 Sony 旗艦更多人買,LG 似乎可以靠 V20 翻身了。至於 LG 另一旗艦 G5 又如何呢?相比 V20,G5 賣價就無企得咁硬,但其實減價的速度已經相比以往 G4 慢了不少,大舖賣緊 $3998。不過最近版主留意到,有 SUN Mobile 門市正在做緊 $3798 的淨機優惠,平大舖 $200,聽店員講已經清緊貨,之後應該唔會再有貨,會主攻 V20,又係咪最佳的入手方案呢?一般去大舖、網絡商買機,都係貪佢夠穩陣,不過如果真係嫌唔夠平,細舖約 $3680 又會否考慮呢?
▲ 版主留意到,有 SUN Mobile 門市將 LG G5 減多 $200,賣 $3798。雖然未及細舖 $3680 咁抵玩,但在大舖 / 網絡商買機,應該就會相對買得安心啲嘅~
Moto 模組手機淨機新低位,網友真係唔考慮?
上星期就話 MotClub HK 搞限時優惠,「平賣」Moto Z,訂購日去到今日就完。不過其實唔使等 MotClub HK 個優惠,Moto Z 淨機細舖原來仲平!版主在深水埗細舖行場時留意到,Moto Z 淨機而家已經跌到落 $4080 呢個價位,相比 MotClub 優惠的 $4198 還要便宜,不過模組就相對地貴。版主問過,如果 Moto Z 配 JBL 喇叭 / 電池模組,加埋就要大約 $4900 左右; 而比較多人留意的哈蘇相機模組就單賣 $2499。至於投影機模組,賣價則為 $2299。雖然連埋模組計番上黎,可能未必夠 MotClub HK 優惠抵,不過既然 MotClub HK 個優惠都已經完了,有心想買的網友,細舖應該會是你的另一選擇吧?
Moto 同 LG 模組手機,呢個價錢,網友又會點揀呢?不如留言講下啦!
▲ Moto Z 大舖仲係即減 $300,賣 $4699,咁貴應該都不會考慮大舖入手吧?
LG G5 在文章發表時,大舖賣價為 $3998,按這裡有詳細規格及最新賣價。
Moto Z 在文章發表時,大舖賣價為 $4699,按這裡有詳細規格及最新賣價。