LG G5 系列賣價不減反加？限時買 G5 送 Hi-Fi Plus
相信唔少網友都知道，LG G5 系列香港係有兩部機，一部係就咁 G5，另一部則係平價版的 G5 SE。先講左旗艦級數的 G5 先，其實 G5 大舖價都係同之前一樣，都係 $3998，不過而家 LG 推出了冬日優惠，由即日起至 12 月 31 日，購買 G5 就唔送電，改送 B&O Play 模組，個 Hi-Fi Plus 原價都要 $1998 架，而家送埋俾你，會唔會更抵呢？細舖方面，G5 最新賣價為 $3680，如果要埋 Hi-Fi Plus，就要加多 $100，即係約 $3780，呢個價網友又會唔會考慮？
咁點解話 LG G5 系列賣價不減反加呢？講緊嘅係平價版的 G5 SE，版主一直都有留意住細舖賣價的走勢，大約係月頭的時候，細舖就賣緊 $2880 左右，點知一個星期後，大約 9 號左右，就加左 $100。咁加果 $100 其實唔係好多，果陣都未引起版主的注意。點知到前幾日，又再加多 $100，前前後後加左兩次，最新賣價提升到 $3080。同 G5 一樣的是，如果想要埋 Hi-Fi Plus，同樣係加多 $100，即 $3180，但差果少少錢，相信多數網友都會揀 S820 旗艦級數的 G5 吧？
▲ G5 而家有冬日限時優惠，買機唔送電送 Hi-Fi Plus，不過平價版的 G5 SE，呢幾星期細舖價不斷上調。
▲ 而冬日優惠當中，仲有 V10 送電池套裝。不過而家多數都會考慮 V20 吧？
LG V20 行貨新低價，係時候入手未？
V20 係近期難得一部，大舖都賣到要加價的 LG 手機，一來唔夠貨，二來多人感興趣。雖然而家大舖的賣價已經跌番落去 $5398，不過其實始終唔抵玩，太貴了。如果真係想入手 V20 的話，會唔會細舖價仲吸引呢？版主近日發現，V20 細舖已經跌到落一個新低價，由月頭的 $5080，跌多 $200，最新賣價為 $4880。呢個價錢，網友又係時候入手未呢？
LG G5 在文章發表時，大舖賣價為 $3998，按這裡有詳細規格及最新賣價。
LG V10 在文章發表時，大舖賣價為 $3498，按這裡有詳細規格及最新賣價。
LG V20 在文章發表時，大舖賣價為 $5398，按這裡有詳細規格及最新賣價。