尋日有傳聞指 HTC 會為 U11 Plus 推出透明 Translucent 機身，好多網民仲話冇可能，點知話咁快就已經有圖有真相。HTC U11 Plus 並非光脫脫睇通電池電路板咁低手，Translucent 機殼有鏡面反光效果，但細心一望就會見到裡面可能係無線充電用的線圈，如果屬實將會係 HTC 首次提供無線充電選項，電池容量接近 4,000mAh，而HTC 亦確認 U11 Plus 的機身有防水功能。
▲清楚見到無線充電線圈，使用玻璃機身的確有更大彈性。
另外 HTC U11 Plus 亦保留了 Edge Sense 功能，除了方便影相之餘，今次 HTC 亦加入了全新的轉盤式快捷鍵介面，可以鍊一下機側呼叫圓形的轉盤，選擇唔同 Apps 或功能。預載的系統已經是 Android 8.0 Oreo，並且有 HTC 自家 Sense UI。未知係咪受到開發 Pixel 2 的啟發，HTC U11 Plus 使用單鏡頭相機的設計，至於效果係點就要實測過後先可以評論。
▲ 用 Edge Sense 可以打開轉盤式工具列，常用的 Apps 同功能都可以透過雙圈快速啟動。
為了遷就 6 吋大螢幕（同時不被人笑大下巴），U11 Plus 的指紋掃描將會設在機背相機鏡頭下方。手機價格方面，超高銷售稅的歐洲市場，128GB 版本售 730 歐元（折合 HK$6,628），不過扣除稅項後，可能只需 5,000 港元左右。
▲單鏡頭相機下面係指紋辨識，Translucent 半透明機身有鏡面效果，係幾靚仔！
▲ 窄邊框設計加上將指紋辨識搬去機背，屏佔比提升，6 吋螢幕都唔覺太大。
資料來源：gadgethacks