會否全面取代現有 Zenfone 2 ？ Zenfone 2 三款新機將登場！
實在不能否認版主太大意了，因為跟據最新消息， Asus 黎緊除左會出新機取代現時的 Zenfone 2 ZE550ML 系列之外，原來仲會一口氣同時推出 Zenfone Laser 、 Zenfone Deluxe 同埋 Zenfone Selife ，而家就同大家講下新機的規格同特點，心水清的朋友可能就會明白當中有甚麼玄機了。首先講一講 Zenfone Laser 先，呢部機係即將來港三款新機中規格上比較入門的一部，主要賣點就係在相機上加入左雷射對焦同埋手動模式，以及加入可換電設計。係硬件規格上， Zenfone 2 Laser 分為 ZE550KL 同埋 ZE500KL 兩個版本，係屏幕、處理器同電池大小會有不同。前者用上 5.5 吋 720p IPS 屏幕，處理器就用左 Qualcomm S615 處理器配 2GB RAM 以及 16GB 內置容量，支援最大 128GB SD 卡。係相機上就係 500 萬像素前鏡同埋 1300 萬像素主鏡頭的配置，電池方面就係 3000mAh 可換式電池。 ZE500KL 版本唔同的地方就係有 5 吋 720p 屏幕，處理器降為 Qualcomm S410 同埋用左 2400mAh 可換式電池。
另外要講嘅就係之前 YK 都同大家分享過的 Zenfone Selife （版本名為 ZD551KL），呢部機的主打就係前後配備 1300 萬像素 PixelMaster 廣角鏡頭，加上雙色溫 LED 補光燈。係規格上就有 5.5 吋 FHD 解像度 IPS 屏幕，處理器為Qualcomm Snapdragon 615 配 3GB RAM 以及最大 128GB SD 卡，相機就係前後 1300 萬像素鏡頭以及 3000 mAh 可換式電池。要留意係 Zenfone Selife 有 16GB 同埋 32GB 兩種容量規格的。
最後一個系列的新機就係 Zenfone 2 Deluxe 了。呢部係將會推出的新機之中唯一一款會用 Intel 處理器的新機，外型上改用左多角形設計。係硬件上， Zenfone 2 Deluxe 用左 5.5 吋 FHD 解像度 IPS 屏幕， Intel Atom Z3580 2.3GHz 處理器配 4GB RAM ，相機都係 500 萬像素前鏡配 1300 萬像素主鏡頭，電池就係 3000mAh 內建式電池。要留意的地方係，即將登場的 Zenfone 2 Deluxe 可能係會令大家有點失望，因為佢只係得 32/64GB 版，看來暫時未必有 256GB 版本了（但都有 128GB SD 卡支援嘅）
▲ 呢部就係 Zenfone Laser ，雖然換左 Qualcomm 處理器但就有得換電，大家又覺得係進步還是退步？
▲ Zenfone Selife 因為用左 1300 萬像素前鏡的關係，所以外觀上都相當易認。
▲ Zenfone Deluxe 在台灣推出時無左重大賣點 256GB 內置容量，看來香港係推出時都不會有了，另外三款新機會在 9 月 1 號登場。
定價透露更多資料，新機會否取代現有 Zenfone 2？
點解版主咁肯定三部新機會一齊來？咪因為台灣而經發佈左囉！係台灣的發佈會上 Asus 同時公佈左定價， Zenfone Laser 5.5 吋芒 ZE550KL 版本定價係 5990 台幣（約為港幣 $1438 ），而 Zenfone Selife 16GB 版本定價係 6990 台幣（約為港幣 $1678）、 32GB 版本定價係 7990 台幣（約為港幣 ＄1918）。最後 Zenfone 2 Deluxe 32GB 版本定價為 8990 台幣（約為 $2158 港幣）以及 64GB 版本為 9990 台幣（約為 $2398 港幣）。雖然版主收到風， Zenfone Laser 、 Zenfone Deluxe 同埋 Zenfone Selife 都會來香港，但係會好似台灣咁推出咁多個型號實在係未知之數。有一樣要留意的地方係 Asus 在台灣的做法是用呢三個系列的新機去取代現時定價相近 Zenfone 2 。係香港又會點呢？
之前提到過 16GB 內置容量的 Zenfone 2 ZE550ML 系列將會被取代，相信取代者就會係定價近乎一樣的 Zenfone Laser 啦！同時近日版主發現 Asus Store 上 ZE551ML 系列的 32GB 內置容量 4GB RAM 版本 Zenfone 2 都只剩下紅色版本，唔知會唔會代表 32GB 內置容量版本的 Zenfone 2 都會抽起？最後，參考完台灣定價之後大家覺得三個系列的新機會大約係甚麼價錢呢？一齊來講講啦！
▲ 係 Asus Store 上，4GB RAM 32GB ROM 的版本都只係得紅色有貨了。