開賣一星期，入手 6 吋芒 Zenfone 2 Laser 著數？
上星期 Asus 出人意料地推出左一部係 Zenfone 系列中最大芒的 Zenfone 2 Laser 6 吋芒版本，以 Zenfone 系列來計都算係旗艦級的規格。除左 6 吋 FHD 大芒之外仲有兩粒「五磁鐵揚聲器」，硬件方面就有 Qualcomm S616 1.7GHz 處理器配 3GB RAM 以及 32GB 內置容量（支援最高 128GB SD 卡）。相機都有 0.03 雷射對焦的 1300 萬像素鏡頭。可能因為規格不錯的同時價錢都相當「親民」，係 Zenfone 2 Laser 推出左一個星期左右，官網 Asus Store 就已經無左金色版了。明明推出左一個星期有多，如果大家想入手金色版或者係想以更便宜的價錢入手的話，版主到深水埗高登黃金同福仁行過一轉，發現想以平價入手其實真係唔難！係高登場內，有細鋪就將 6 吋 Zenfone 2 減左一百，再送多粒 ZenPower 。如果想用更便宜價錢入手的話，福仁場內就有細鋪做緊 $2099 嘅。
▲Zenfone 2 Laser 忽然殺出來，大家反應看來都很正面。
▲而家 Asus Store 金色版暫時缺貨，不過一般大鋪都可以買到。另外，而家係 Asus Store 上搞緊個冬日優惠，雖然手機就無減到價，但就送多左配件嘅。
C5 Ultra 大鋪再減價，性價比更高？
係 Zenfone 2 Laser 推出之前，人氣最高企的 6 吋大芒機就要數 C5 Ultra 了，呢部 Sony 定位中階的手機係一推出之後都有不少網友留意，因為 Sony 自 Z Ultra 之後都無再出過大芒機了。可惜， C5 Ultra 始終只係屬於中階手機，版主聽聞呢部機用耐左體驗唔算話好出色。可能因為 Zenfone 2 Laser 價錢相當進取， Sony 都不敢怠慢。版主到大鋪問價時，發現 C5 Ultra 價錢已經減左價，由 $2998 減至 $2698 ，雖然都唔夠 Zenfone 2 Laser 平，但話晒係 Sony 出品，都會有一定號召力的。
▲ Sony C5 Ultra 價錢再有減，但係面對競敵 Zenfone 2 Laser 又有沒有優勢可言？
Mate 8 一出 Mate 7 又抵唔抵？
華為年底重頭戲 Mate 8 剛剛就發佈左，推出左已經好一段時間的 Mate 7 而家係大鋪仲買到，但係價錢其實都好感該要減了。版主係仍有賣 Mate 7 的大鋪睇過，發現價錢其實⋯⋯都唔算好平。 Mate 7 分為規格較高的金色加強版以及標準版，當中有 3GB RAM 的金色加強版價錢為 $3980 ，而 2GB RAM 的標準版價錢就三千有找，要 $2980 左右。相對上好像同樣係 6 吋芒的 Zenfone 2 Laser 更抵啊！唔知呢幾部 6 吋大家又點揀呢？一齊留言講講啦！
▲Mate 8 推出後 Mate 7 其實係大鋪都清緊貨，但看來卻不算好抵玩呢。
在文章發佈時， ZenFone 2 Laser 賣價為 $2299 ，按此看手機規格及最新賣價。
在文章發佈時， Sony Xperia C5 Ultra 賣價為 $3298 ，按此看詳細規格和最新賣價。
在文章發佈時，華為 Mate 7 賣價為 $3198 ，按此看詳細規格和最新賣價。