大屏手機大平賣！5.7 吋 6GB 手機挑機三星 Note 旗艦，邊部你會揀？

左定坤 (Cho Ting Kwan) 2017-01-09 12:41 | Asus

好似某日本品牌咁，出來出去都係細芒手機，並唔係好多香港人識得欣賞，反而手機尺寸愈大，就相對地愈有吸引力。講到而家大芒又平價的手機，華為 Mate 8 會是不錯的選擇，標準版大舖跌落 $3000 有找，令到版主身邊朋友心郁郁。但係如果 6 吋芒又嫌太大，但又想玩 5.5 吋以上的手機，最近有部 5.7 吋旗艦手機大舖減價，挑機三星 Note 系手機，又會唔會啱你心水呢？即刻睇下文啦！



5.7 吋 6GB 手機仲有 64GB ROM！大舖新低價夠吸引未？
6GB RAM 手機開始慢慢成為主流，就連三星都玩埋一份，最近在香港開賣的 C9 Pro，正正就有 6GB RAM，不過級數只係中高階，對於喜歡用 spec 來定義手機的網友，或者就未必適合。如果想級數旗艦啲，其實上年已經有，佢就係 ASUS ZenFone 3 Deluxe，配備 S820 處理器，內置 6GB RAM 以及 64GB ROM，不過剛推出時定價太高，加上大舖價一直企硬 $4699 唔減，所以唔係太吸引到網友入手吧？最近 ZenFone 3 Deluxe 大舖終於「即減 $600」，最新賣價為 $4399，又會唔會提升番少少吸引力呢？


▲ ASUS ZenFone 3 Deluxe 大舖而家有「即減 $600」優惠，呢個價值得入手未呢？不過肯定實有網友會話，S820 仲要係華碩，賣四字頭依然係貴。但如果本身對 ZenFone 3 Deluxe 有興趣的話，或者又可以考慮一下。

大舖仲有賣三星 Note＿？呢個價認真吸引？
相信大家都知道，自從三星 Note7 事件之後，好多三星手機都忽然在大舖消失哂，好似 A5 (2016)、A7 (2016)、A9 (2016) 等等，甚至連上代 Note 5 都銷聲匿跡......仲未！版主發現，有豐澤仲有將 Note 5 拎出黎賣，應該係想清埋啲尾貨，最新賣價只係 $3412，用 Exynos 7420 有 4GB RAM、32GB ROM，而 Note 系列最大特色，係佢仲有支 S Pen，可以畫下圖 jot 下 notes，有興趣平玩 S Pen 支筆嘅話，呢個價錢，相信可以考慮一下。唔知網友又點睇呢？


▲ 呢個價錢平玩三星 Note 系，其實就連版主自己都有點心郁郁...... 可惜版主窮要儲錢，無辦法了吧

ASUS ZenFone 3 Deluxe 在文章發表時，大舖賣價為 $4399，按這裡有詳細規格及最新賣價。
Samsung Galaxy Note 5 在文章發表時，最平賣價為 $3412，按這裡有詳細規格及最新賣價。