6GB 大芒旗艦突減價！6.8 吋 4600mAh「巨電王」跌落三字頭！

左定坤 (Cho Ting Kwan) 2017-02-10 21:59 | Asus

考下網友，估唔估到版主講緊乜: 有一間手機廠商，一向都玩開低價路線，但突然間轉玩貴價，仲要一直企到硬一硬，唔肯減價，貴過人哋同類機種多多聲，但喺香港又唔算特別受歡迎，知唔知版主講緊邊個廠商？呢個廠商上年有兩部手機賣得特別貴，一部係旗艦機種，咁無得好講啦，另一部中高階機種，都要賣到成四千幾蚊，唔係淨係版主覺得，有不少網友都覺得貴。可能係太貴影響銷量嘅關係，呢兩部手機終於肯減價了！減完，你又會否考慮呢？睇下文啦！



6GB 大芒旗艦價有減！呢個價仲係咪貴呢？
估到未呢？估唔到版主就揭盅，講緊嘅係 ASUS，旗艦果部一定係 ZenFone 3 Deluxe 啦！規格來說唔可以話差，差極都仲有 S820 處理器，而且仲有 6GB RAM 以及 64GB ROM，要知道 6GB RAM 已經漸漸成為現今手機的一個標準，不過係 ASUS，你又會唔會考慮呢？睇埋價錢先，一月果陣 ZenFone 3 Deluxe 曾經減過一次價，賣 $4399，減完都仲係被網友鬧貴，時隔一個月終於肯再減，網友又覺得係咪都仲係好貴呢？


▲ ASUS ZenFone 3 Deluxe 最新賣價為 $4199，不過 S820 U 仲要四千幾，你會買嗎？

6.8 吋 4600mAh 「巨電王」跌落三字頭！不過中階又入唔入得過？
對 specs 熟悉的網友，應該好容易估到，版主講緊邊部機。佢就係 ZenFone 3 Ultra，6.8 吋巨芒啱哂鍾意睇片的網友，不過佢唔係用旗艦 U，只係用上 S652 處理器，用來打機的話唔係唔得，但相對 S820 手機來說，無咁順暢。另外，ZenFone 3 Ultra 有 4GB RAM + 64GB ROM，最大特色是配備 4600mAh 核電，比市面上大部份手機的電量高出很多，續航能力相信用足一日，都應該夠用。而家大舖價終於跌到落三字頭，最新賣價為 $3999，但其實同旗艦嘅 ZenFone 3 Deluxe 相差果 $200，你又會點揀呢？


▲ ZenFone 3 Ultra 同 ZenFone 3 Deluxe 都係相差果 $200，有 6.8 吋巨芒 + 4600mAh 核電，兩部俾你揀你會揀 Ultra 還是 Deluxe?

ASUS ZenFone 3 Deluxe 在文章發表時，大舖賣價為 $4199，按這裡有詳細規格及最新賣價。
ASUS ZenFone 3 Ultra 在文章發表時，大舖賣價為 $3999，按這裡有詳細規格及最新賣價。