五千核電續航大對決!ASUS ZenFone 4 Max Pro 挑戰終極「長氣王」?

左定坤 (Cho Ting Kwan) 2017-10-14 13:44 | Asus
又想平,又要求有大電,相信不少網友第一時間諗到的,應該會是小米 Max 2,不單止用上 S625 慳電 U,仲要有 5300mAh 大電,講長氣,我諗無乜邊部夠佢嚟。如果真係要講鬥續航力,下半年的平價手機系列中,都有一部係可以同小米 Max 2 揮下嘅,佢就係 ASUS ZenFone 4 Max Pro,雖然規格上就相對小米 Max 2 弱一點,但講到長氣,佢內置 5000mAh 大電未必會輸。版主都好想知道,到底呢兩部手機之中,邊部才是「長氣王」,所以決定做個續航力評測。如果都有興趣想了解下,就繼續睇落去啦!

續航比拼(Facebook).jpg

以下的比拼會分兩個回合進行,第一回合會是透過跑分軟件 PCMark 測試 ASUS ZenFone 4 Max Pro 以及小米 Max 2 的續航力,第二回合則會是測試影片播放時間。至於點解版主唔試埋打機的時間呢? 因為本身 S435 同 S625 這兩粒處理器,都不是 for 你打機用吧,通常用得呢兩部手機,都唔會係為左打機。

第一回合: 跑分軟件試續航力

版主今次會用的軟件是 PCMark,運行「工作 2.0 電池使用壽命」的測試,配備 S435 處理器 + 5000mAh 大電的 ASUS ZenFone 4 Max Pro,得出成績有 16 小時 24 分鐘,成績來說相當不錯。不過以為呢個表現已係最長氣的手機? 想不到小米 Max 2 的成績表現更佳,有 20 小時 58 分鐘,接近 21 小時,是一個挺誇張的成績。而有這樣的成績,理論上使用兩天,都游刃有餘。

PCMark ASUS.jpg PCMark 小米.png
▲ 左圖為 ASUS ZenFone 4 Max Pro 的成績,而右圖則為小米 Max 2 Pro 的成績。兩部手機相差 300mAh,但跑出的時間相差近 4 小時 30 分鐘。

第二回合: 720p YouTube 影片播放測試

小米 Max 2 配備了 6.44 吋 1080p 屏幕,沒錯是可以播放到 1080p 影片,但點解版主選擇了比較 720p 影片播放的時間呢? 最主要原因是 ASUS ZenFone 4 Max Pro 最高只支持 720p 影片播放,所以就唯有就一就 ZenFone 4 Max Pro,在 YouTube 找了段 720p 影片進行比較。而呢部手機測試的條件都是一致的:亮度 100%、音量約 75%、起始電量為 100%。

播放 720p 影片 1 小時後,ASUS ZenFone 4 Max Pro 的電量剩 92%,即播放 1 小時 720p 影片,大約用了 400mAh 電,可以推算 5000mAh 電的 ZenFone 4 Max Pro,大約可以播放 12 小時 30 分鐘 720p 影片。至於小米 Max 2,播放 1 小時 720p 影片後,電量餘下 93%,即大約用了 371mAh 電,可以推算 5300mAh 電的小米 Max 2 能夠播放約 14 小時 17 分鐘 720p 影片。

ASUS ZenFone 4 Max Pro
ZF4 Max Pro Start.jpg 小米 Max 2 End.png
▲ ASUS ZenFone 4 Max Pro 的電量剩 92%,即播放 1 小時 720p 影片,大約用了 400mAh 電,可以推算 5000mAh 電的 ZenFone 4 Max Pro,大約可以播放 12 小時 30 分鐘 720p 影片。

小米 Max 2
小米 Max 2 Start.png 小米 Max 2 End.png
▲ 小米 Max 2,播放 1 小時 720p 影片後,電量餘下 93%,即大約用了 371mAh 電,可以推算 5300mAh 電的小米 Max 2 能夠播放約 14 小時 17 分鐘 720p 影片。

小結

版主曾經用過這兩部手機一段時間,兩部手機都能夠滿足到我一天所需,用來做蛋放 Wi-Fi、搭車睇下片,都完全不是問題。ASUS ZenFone 4 Max Pro 在續航上的表現實在是不錯,但仍然不及擁有 6.44 吋巨芒的小米 Max 2 省電,如果你想找一部終極的「長氣王」,小米 Max 2 是一個選擇,但如果唔想拎住咁大部機出機,嫌太大部的話,ZenFone 4 Max Pro 亦可以是第二選擇。你又會鍾意邊部多啲呢?

ASUS ZenFone 4 Max Pro 在文章發表時,大舖賣價為 $1999,按這裡有詳細規格及最新賣價
小米 Max 2 在文章發表時,官網賣價為 $1899,按這裡有詳細規格及最新賣價

最新新聞