方案 1:上台會唔會更抵？需要上網留資料嗎？
第一個想同大家討論既方案就係上台出機啦，係新 iPhone 發佈之前，幾間電訊商包括 csl.、 3香港、SmarTone、同埋 PCCW 都叫人上網留資料，話可以第一時間收到新機開賣資訊，究竟有冇用呢？版主問過 csl.、3香港同中移動的門市，店員都話就算上網／在門市留資料，都只係在開放預訂的一日立刻通知客戶，並不等於已經預訂了，所以現在留低資料都未必可以更早有機。值得留意的是 SmarTone 的 Red Pass ，官網寫明會「預留位置」、「率先出」，而版主去過門市問，店員都好肯定的回應：「有留 RED Pass 一定比沒有留位的快」，換句話說就已經係一個排隊的情況，早一步登記的確係有優勢。不過提提大家，新 iPhone 的貨量和需求量暫時都未有人肯定到，或者貨量充足到開賣初期就可以隨時上台？（上年就是如此）要唔要留自己既私人資料大家可以慎重考慮下。
另外亦都唔少朋友／網友問版主既一件事，上台出新 iPhone 抵唔抵？因為見到有相關報導話「街霸」落力 Sell 客，叫佢先出一個帶機上台月費，隨後新 iPhone 開賣時買「淨機」會更加划算。其實想一想就知道不可能，如果帶機上台月費平過出機的話，就沒有人在網絡商出機啦！根據以往多年經驗，如果需要月費＋ iPhone 的話肯定上台更平！同時比個貼士大家，係電訊商門市店員鐘意計「預繳」、「回贈」令到數字好混亂，其實要比較月費計一計兩年總支出就一目了然！
▲ SmarTone 講明現在先登記，就會有優先次序，不過記得睇清楚，佢係寫住旗艦級手機，並唔係寫明 iPhone 6 啊
。方案 2. 街鋪排隊！係咪又要「食骨」？
如果唔需要上台既話，就同大家討論一下買 iPhone 「淨機」啦。由 iPhone 5 開始除左 Apple Store 有機賣之外，亦有大型連鎖店如百老匯、豐澤等在開賣第一天同步賣機，所以會有唔少人在門口排隊。值得留意的是上年 iPhone 5s 只有豐澤進行首賣，百老匯和衛訊第一天是沒有機賣的，令到人流更加集中更難排隊，暫時未知今年的情況，都要版主稍後同大家留意。另外係連鎖店買機既一個特點就係需要「食骨」，過去幾年想首日買 iPhone 必須同時買 $1,000 ~ $2,000 不等的配件，又或者需要買其他貨品到到一定金額先可以同時買 iPhone ，入手成本會比機價本出多，值唔值得為左「早買早享受」而咁做？真係見仁見智
。
▲這是上年的情況，年年都好多人排隊買新 iPhone ，甚至要早一天排隊
方案 3. Apple Store 預訂！又玩「秒殺」？
有網友可能會諗：「既然係 Apple 產品，咁點解唔去 Apple Store 買？」其實最正路都係應該係咁諗，我地又不妨回顧番上年 iPhone 5s 開賣既情況吧？上年 9 月 21 正式開賣的 iPhone 5s ，必須先在網上預約才可以在門市拿機，而預訂的第一天 6:00 就已經因為人流太多而死 Server，不過最終版主 Keith 都順利預訂得到。而在開賣當日，版主在七點幾去到 Apple Store 門口排隊，都順利買到 iPhone ，就咁睇係最正路既做法。要留意既係，上網如果預約唔到既話，即場 Walk-in 係唔會買得到 iPhone ，所以重點就係預訂當日一開始就要「秒殺」（好似搶平價機票咁
），大家買定多一個 Keyboard 黎 F5 吧。
▲ 上年的情況是開賣幾日前上網預約，然後當日在 Apple Store 排隊拿機
方案4 . 唔介意挨貴機！先達炒價入手
！
講到最後，都仲有一個方案比大家。如果大家唔會嫌貴，都可以去先達廣場即日買炒價機。其實呢個方案版主就相當唔建議：一來 iPhone 6 就算版主睇淡，預期炒唔到去 $12,000 ，但係頭一個星期都最少有 $1,000 ~ $2,000 既水位，入手價隨時可能貴 50% 以上；二來先達買機點都存在一定風險，曾經有網友分享過買到真機，但係入面既 Lighning 線係假貨，如果真係要買就要對清楚盒上面既 IMEI 、配件、比錢前最好上 Apple 官網確認一次機身編號有冇保養。當然，有好多唔同既情況有機會發生，唔熟手機既網友真係博唔過。
▲上年第一日回收價都貴 $2,000 ，可想而知炒價有幾貴