版主聽聞，今日 Apple Store 會有紅色版真機擺出來，於是一朝早就去左沙田 Apple Store 度，了解一下銷售情況。不過行左一個圈，都未見紅色特別版 iPhone 7 的蹤影，於是版主問下職員，幾時會有真機擺出來，職員表示最快應該聽日就會有，咁版主見 Apple Store 無料到，就轉移目標去先達八下啦！
不八猶可，一八就發現，原來紅色特別版 iPhone 7，已經有先達店舖有貨，不過你係要買，佢先會拎俾你。咁當然版主無必要買，我最想知就係第一批貨會賣幾錢。個價嚇死人，版主分別問左兩間店舖的價錢，一間問細機，一間問大機，細機 128GB 賣 $8700，而 256GB 則賣 $9200。至於大機 128GB 就賣 $8600，而 256GB 就賣 $10000。來自兩間唔同的舖頭，但其中一間細機個賣價居然仲貴過大機？不過，呢幾日紅色 iPhone 7 個賣價相信會浮動好大，個價暫時都仲未定。但講真果句，在官網到而家都仲有得訂的情況下，真係有人會為左早幾日拎到機，而食炒價入手特別版 iPhone 7 嗎？會呢個時候入手果啲，應該係土豪先會做得出。你又點睇呢？
▲ 香港 Apple 官網長訂長有，截至目前為止，送貨日期去到四月左右。
▲ 望埋大陸 Apple 官網，直澄今日預訂，一個工作日就送貨，得兩個可能性，一係就好多貨，一係就無人買，但呢兩個跡象都顯示，似乎有得炒的機會好微。而版主在先達三樓某店舖都收到風，公司貨到已經減 $300 - $400 左右，即係例如原價 $7188，就可能回收價只得 $6888，似乎炒風並不樂觀呢！不過咁又係，要買 iPhone 7 的人，一早就已經買左，真係會為左轉色而入手的人少之又少，網友又點睇呢？