雙卡五模多頻 3GB RAM 、 4100mAh 大電量 Huawei Mate 7 街鋪行貨減價
提到係 2014 年邊部大陸廠牌旗艦機多人討論, Huawei 的 Mate 7 相信會係其中一部。原因相當簡單,佢嘅金色加強版除左有 4G 雙卡同支援到中國大陸的 3G/4G 網絡之外,仲有 6 吋 FHD 大屏幕同埋八核處理器以及 3GB RAM 。而相機又有 1300 萬素主相機以及 500 萬像素前相機再加 4100mAh 大電量。以規格來講實在係冇乜嘢可以挑剔,所以係剛推出的時候唔少網友都幾期待。最近,版主就留意到不論係深水埗還是旺角場內的行貨版 Huawei Mate 7 都開始減價,有雙卡同埋 3GB RAM 金色加強版「全新行貨」賣價大約係 $4180 左右,比起原本 $4680 的定價平左五舊水,其實呢部機一直以來都有水位,版主甚至見過炒貴到 $5,000 左右都仲有人買,而家炒完價錢回落到 $4,200 比起之前更抵啊!
想試 2.5G 雙面曲面玻璃仲買唔買 Galaxy S6 ?小米 Note 水貨抵港
Samsung 的 Galaxy S6 一改以往膠機設計,以前後雙玻璃配金屬邊框作為設計特色,最近有傳 Galaxy S6 的賣價會接近六千!其實係年頭發佈的小米 Note 一樣係用雙曲面屏幕同金屬邊框,仲要早過 Galxay S6 發佈添,而且係支援聯通同移動 4G 以及 FDD-LTE B3 (1800) 、 B7 (2600) 的 4G 雙卡手機,香港都用到 4G LTE,亦有大陸的 TD-LTE 與 TD-SCDMA。係規格上小米 Note 有 5.7 吋 FHD 屏幕, Qualcommm S801 處理器搭配 3GB RAM 。相機方面就係 1300 萬像素主鏡頭同 400 萬像素主鏡頭,電量就有 3000mAh 。其實小米 Note 的水貨就已經抵港, 16GB 版的小米 Note 賣價 $3500 ,而 64GB 版就要 $3800 ,炒價比起大陸官方價貴 $800 左右。至於小米 Note 的行貨版,版主其實都未知會幾時出,但呢類旗艦機大家都係做定心理準備要「輪米」啦⋯⋯
2K 芒、 3GB RAM + 兩千萬像素! MX4 Pro
最後要講呢部機就係大鋪都可以買到,魅族係 2014 推出的旗艦 MX4 Pro 啦!呢部 MX 4 Pro 除左支援移動 TD-LTE 和中國聯通 FDD/TD-LTE 雙 4G 網絡五模十三頻之外,規格上同 Mate 7 同小米 Note 亦都有力一拼。除左用上 5.5吋 2K 芒之外, MX 4 Pro 亦配備雙四核 Samsung Exynos 5430 處理器同 3GB RAM ,相機亦有 2070 萬像素主鏡頭同 500 萬像素前鏡頭,電池方面都有 3350mAh 大電量。目前係大鋪魅族 MX 4 Pro 賣價要 $3298 係今次介紹手機之中最平的一部。分享完有齊中港 4G 大電量同埋 3GB RAM 的手機後,唔知大家又覺得邊部最吸引到你呢? Click 入下圖就可以睇到三部機的規格比併,大家不妨留言分享下啦。當然,有吸引力的中港 4G 機其實相當多,大家有好推介都可以講下㗎!
在文章發佈的時侯,華為 Ascend Mate 7 金色加強版定價 $4,680,按此看詳細規格和最新賣價。
在文章發佈的時侯,小米 小米 Note 仍未在香港正式推出,按此看詳細規格和最新賣價。
在文章發佈的時侯,魅族 MX4 Pro 定價 $3,298,按此看詳細規格和最新賣價。