臨近七一，睇黎大陸廠商都不咁於安靜，果邊版主 Lawrence 同大家直擊報導魅族發布會，大家正在期待 MX5 之際，呢邊華為都不甘示弱，搶閘推出 Honor 7！ 望下個規格： 2000 萬像素主鏡頭 + 雙色 LED，800 萬像素前鏡頭 + LED 補光燈，配合全高清解像度既 5.2 吋屏幕。Honor 7 採用自家 64bit 八核心麒麟 935 處理器，3GB RAM + 16 / 64GB ROM，亦毫不意外地支援全網通。電池續容量亦達到 3100 mAh，並支援快速充電，充電 5 分鐘可以待機 15 小時。同時 Honor 7 加入最令我喜愛的指紋識別器，方便指紋解鎖同安全交易付款。華為 Honor 7 賣價由 1999 人民幣起。
華為呢款 Honor 7 明顯集合左其他品牌既優點：但我細心一睇全金屬機身，背面個樣完全係啊 HTC MAX；再望下個 Honor 7 主鏡頭模組採用 Sony IMX230，跟樂視 Le MAX 一樣，同樣有 2000 萬像素解像度。而主打功能竟然有美食模式，能夠增加畫面中食物既鮮豔度；而 Honor 7 亦支援自定慢動作功能，可以任意選擇影片中一段作為慢動作，以上兩個功能都十足 Sony 旗艦手機功能！
新一代 Honor 7 帳面上既升級大家當然唔會就咁滿意啦。我為大家搜羅發布會現場部分值得關注既功能。第一、可以比我更流暢地地 ThisATV！ 華為聲稱 Honor 7 的全網通技術做到智能偵測訊號，根據場景自動切換使用訊號較好既 SIM 卡，最正係可以並且做到同時開通數據，好似做到同時雙卡雙通道使用數據下載，令你上網速度。 情況就如我咁因為工作需要有兩張限速卡，但操作上都係鎖死係最高 384kbps。但如果 Honor 7 上面就會變成 384 + 384 kbps，姐係我睇片會更快，睇 ThisATV 更流暢開心！但你唔好咁開心住，呢個設計係大陸就有用，但係香港就。。。嘿嘿，Honor 7 官網頻譜顯示，如果係香港制式下，最多只能 4G 和 2G 同時運作，姐係快多幾 KB 咋。
越多廠商加入玩指紋，但功能都係主要係解鎖，最多都係做 Home 制。華為聲稱 Honor 7 個指紋解鎖有學習功能：0.5 秒快速解鎖，同時儲蓄五組指紋，而且會越用越準確。因為個指紋識別器會係你每次放上正確手指後，會再記錄並補完你既指紋圖。同埋個指紋識別其有下拉功能，做到下來通知欄，甚至可以解鎖接聽來電等。
來到大家最關心既售價，人民幣 1999 元係移動版咋！ 如果要買全網通版，需要人民幣 2499 元 ( 約港幣 3122 元 )，但跟機是 64GB ROM 版本，並會送 9V/2A 快速充電器。
網友們覺得呢個定價配如此規格，如果到港會唔會係吸引到你買呢？ 快 D 講下你點睇啦！