國產千元機大混戰!華為 Honor 5X 性價比有無更高?
係以上提到的幾部千元機之中,華為 5X 定價最平,只係 999 人仔。不過,要留意係華為 5X 有兩個版本,分別係如前所述,定價 999 人仔的移動版,不過因為官方資料中,移動版係不支援 FDD LTE 的。所以對於港人來說,定價 1399 的全網通版是唯一選擇,而版主今次試玩的都係呢個版本。係配置上,其實 Honor 5X 同之前版主阿坤提過的 G7 Plus 好相似。同樣有 5.5 吋 FHD 芒、處理器用左 Qualcomm Snapdragon 616 配 3GB RAM (但係內置容量 5X 比較少,得 16GB)。相機方面都係 1300 萬像素主鏡頭及 500 萬像素前置鏡頭,電量兩者一樣係 3000mAh 。可能大家一見到處理器係 S616 就即時覺得可以無視、無睇頭。不過咁, Honor 5X 相比起 G7 Plus 有一個明顯的優勢,就係外型上「靚仔」好多,而且造工上甚至比華為之前係暑假推出,定位中階的 Honor 7 相比可能更加好呢!
▲ 外型來講,個人認為比起華為 5X 比 G7 Plus 更有中階機的感覺,不過金色版未必人人愛。(其實是版主不喜歡金色)
▲ 因為定位係入門機的關係,華為 5X 包裝盒都是以簡潔為主。
▲ 從機背資料可以見到,金色版的華為 5X 是全網通版本,規格上同最平的移動版都唔同。
造工、手感不俗!華為 5X 外型、屏幕比拼魅族 MX5 !
個人認為,今年手機市場係相當悶但唔可以話無進步,實際上今年 Android 手機的發展可能不是大家所想的慢。以大陸的千元機為例,呢批手機係質量上的進步係相當明顯的,係年頭果陣大陸千元機係講緊有 FHD 大芒已經好唔錯(好像魅藍 Note 同 K3 Note 都引起唔少網友關注)。到左年中,紅米 Note 2 推出時更加誇張,因為其百元機的價位可以玩到旗艦級的 Heilo X10 處理器。來到年尾,當千元機規格都好難再有突破時,大陸牌子就將金屬機身同指紋辨識等旗艦機賣點下放落千元機之中。但整體表現又是否真係做到旗艦級呢?上述的情況可以係華為 5X 上見到,係外型上用了金屬機身再加上拉絲紋設計,同上半年推出的 HTC One M9 感覺很相似。手感同造工都唔會令人有「 Cheap 」的感覺。今次版主特意帶左一樣係用金屬機身作為賣點的魅族 MX5 做個比一比,兩者手感雖然不同( MX5 用的是磨沙質感而華為 5X 質感近似 M9 ),但係設計上都有一個可能令人覺得唔太順眼的地方,就係機背上方同下方都用左不同材質去做(相信係為左遷就天線的緣故)。華為 5X 比起 MX5 優勝的地方係沒有刮手的感覺,不過係外觀同質感上都太明顯,未必係人人都可以接受到。
係屏幕方面,華為 5X 用左 5.5 吋 FHD 解像度的全貼合屏幕,版主一拎上手時,感覺係「做乜個芒咁暗嘅?」。不過調至最光亮度之後,意想不到地比起 MX 5 仲要光,而且屏幕顏色本身亦都比較濃艷。不過,在可視角度上, 5X 係低角度下可以見到光度明顯減弱左,呢點相比 MX 5 就稍為遜色啦。
▲ 大陸牌子呢排都興用 2.5D 玻璃,好似 G7 Plus 其中一個賣點都係呢樣。華為 5X 雖然未有用到,但外觀還算不錯。
▲ 從 5X 可以睇到華為一貫作風,指收掃描器放於機背。
▲ 機背上都有地方可以挑剔,在 Honor 字樣下面的一堆細字其實都幾礙眼。
▲ 係插卡方面,呢到真係要花多少少篇幅講!之前試玩所謂支援雙卡的大陸機,好多時都用左 SIM 卡跟 SD 卡共用呢個設計,對真係有雙卡需要的用家而言相當不便。華為 5X 有兩個卡槽,分別可以插到一張 Micro SD 卡、 Nano SIM 以及 Micro SIM ,咁先叫雙卡機嘛!
▲ 作為支援全網通的手機,華為 5X 當然可以用到香港 4G 啦。
▲ 魅族 MX5 同華為 5X 一樣,用上金屬機身同指紋辨識做賣點,不過前者定位中階而後者係入門千元機。
▲ 機背上兩者都未能做好到好似 HTC One M9 一樣的一體成型感覺,手感上 MX5 的磨沙質感以及 5X 近似 HTC One M9 的質感也有明顯分別,邊個更好就睇個人喜好了。
▲ 邊框上兩者處理手法都唔同,不過都無刮手的感覺。
▲ 同是 5.5 吋芒,不過華為 5X 用左虛擬鍵,看起來芒個較小。但係最高亮度上明顯更出色。
▲ 係低角度上,可以見到 5X 亮度明顯暗左唔少。
中階處理器成績合乎預期,勝在唔算熱?
可能係為左同中階以至旗艦機種的手機作出分別,Honor 5X 未有用到華為自家製的 Kirin 處班器,而係用左 Qualcomm 的 S616 處理器。從成績來講,可以話華為 5X 的表現係合乎預期的,好似在安兔兔雖然唔夠四萬分但都有三萬多。之前不少網友指出 Qualcomm S615 處理器有一大問題,就係同 S810 一樣有明顯的發熱情況。今次版主特意係跑完幾個跑分軟件後看看 CPU Z 的溫度同埋模下機背,都未明顯的感覺到熱,可能可以作為一個賣點?好多時大家都覺得跑分反映不了手機實際表現,版主係試玩呢部機時,就覺得係開啟多工頁面上有點 Lag ,而 「Cap 圖」時反應都幾遲頓,不過係瀏覽網頁時感覺就幾順暢。但係華為 5X 畢竟只係屬於千元機級別,有呢種問題個人認為都係可以接受的。
▲ 安兔兔方面 5X 得分為 35159 ,係一般中階機的水平。
▲ 係 Vellamo 方面,因為始終係用上中階處理器的關係,成績都未算出色。
▲ Basemark 2.0 上 5X 成績為 37.91 ,未算出色。
▲ 上圖係於順序跑完 Vellamo 、 Basemark 2.0 以及安兔兔後 Cap 低。
相機可能係弱點? 1300 萬像素 f2.0 相機試拍
係相機方面,華為官方都未有透露很多資料,只係話 1300 萬像素主鏡頭有 f2.0 光圈同 28mm 廣角。因為而家冬天將至,入夜的時間都提早左,版主就有機會試到呢部機係低光環境下的表現。可以見到係低光環境下,特別係街境來講,華為 5X 雜訊問題都幾明顯。簡單來講,今次的試拍可以見到大陸的千元機係外型上雖然有相當大的提升,不過相機方面同旗艦,甚至中階機,都仍然有一段距離呢!
小結:千元機質感大提升,但整體表現難比旗艦機
睇完上文之後相信大家都會同版主有同一樣的結論,就係同年頭相比,大陸牌子千元機其實有相當明顯的改變,在性價比亦因為咁而相信會提升唔少。當然,咁樣並不是推大家買大陸機。係整體表現來講,可以見到 Honor 5X 同華為自家中/高階機相比都有一段距離,一分錢一分貨呢個道理而家都係無錯的。係價錢方面,因為本身華為 5X 全網通版定價 1399 人仔,較 1099 人仔的魅藍 metal 以及樂視 樂 1s 高,所以係水貨價來講都係比起樂 1s 貴,以抵玩程度而言就比較遜色了。目前華為 5X 水貨價都要 $1950 左右,相信要等一排先會大跌價,唔知大家又覺得華為 5X 吸引力如何呢?留言講講吧!鳴謝:MrNicholas 電話:27701383