6.8 吋巨芒 P8 Max 賣價逼近同門 MediaPad X2 ，邊部更抵玩？
提到大芒機不得不提華為，話說因為香港最終引入了平板 MediaPad X2 （但華為大陸定位其實係手機）的關係，最終屏幕尺吋差不多大但定價卻高得很的 P8 Max 就沒有在香港登場了。但勢估唔到， P8 Max 係大陸價錢一再插水，令水貨賣價而家已經可以追上 MediaPad X2 了。係規格上， P8 Max 因為只係用左 Kirin 935 八核，效能以現時來講只算比中階處理器好少少，但優點係有 3GB RAM 同埋厚度只係 6.8mm 厚，配合金屬機身以巨芒機來講手感不錯。係價錢方面， P8 Max 其實早一個月已經回落至大約 $3600 左右價位，但係近排又跌左差不多一千，深水埗福仁有細鋪賣 $2680 （32GB 版本）。性價比大家又覺得點呢？
▲ 有店主話近來千元機好似紅米 Note 2 等需求開始減少，反而兩千蚊價位但曾經屬於頂級旗艦好似 P8 Max 呢類就有不少人留意。
小米 Note 頂配版終跌價，減價近一千
雖然小米 Note 頂配版屏幕無 6 吋咁大，但係都好值得講。同華為 P8 Max 一樣，小米 Note 頂配版一樣係大家都以為會係香港推出點知最後無左回事的旗艦。小米 Note 頂配版作為小米係 2015 年規格上自家最強的旗艦，有 5.7 吋 2k 解像度屏幕，內置容量都有 64GB 配埋 4GB RAM ，但可能因為用左 Qualcomm S810 處理器而他們又覺得未能完全解決發熱問題，所以沒有在港推出吧？水貨價錢方面，小米 Note 頂配版由第一水要四千幾蚊之後一直減得唔多，都要 $3580 左右。但近月就開始大跌價，深水埗場內落到 $2580 呢個價錢。雖然水貨好難同行貨做比較，但係價錢上其實頂配水機跟港行 64GB 版 S801 小米 Note 價錢相差已經少過一百了。
▲ 小米 Note 頂配版同 P8 Max 一樣係香港無出到行貨，就賣點而言 P8 Max 勝在大芒而小米 Note 頂配版就在規格上有優勢。
Mate 8 、樂 Max 價錢都有減
同樣以巨芒作為賣點仲有樂視的樂 Max 。雖然行貨係下個月就會正式開賣，但係看來水貨都仍然有一定競爭力。近日樂 Max 64GB 版價錢再跌一跌去到 $3280 平左約 $200 左右，而 128GB 價錢就貴四百要 $3680 。雖然港行 Le Max 定價要 $4499 ，但係樂視係香港並不旨在只係賣機，而係賣服務，所以都幾難講水行邊個更抵。另外就係呢排係網上多左人作開箱分享的 Mate 8 ，係價錢上第一水 Mate 8 實在唔平，最貴的 128GB 內置容量 4GB RAM 版要價近六千，近日都回落左少少，賣 $5580 而 64GB 版本就賣 $4800 。對 Mate 8 有興趣的朋友，要留意係下個月華為將會搞多一個 Mate 8 發佈會，意味 Mate 8 應該好快會係國際市場推出，應該包括香港吧！
▲ 除左 Le Max 之外，另一部以入門千元機做賣點的 Le 1s 都會係下月正式在港登場，而水機版本樂 1s 係場價方面就沒有大變。