搶先紅米 Note 3！4000mAh 大電華為 Y6 Pro 登場 價錢更抵玩？

Lawrence 2016-03-09 13:03 | Huawei

昨日同大家提過傳聞已久的紅米 Note 3 終於都發佈有期，相信會係 3 月其中一部相當火熱的新機。小米有新機出，華為當然都唔會執輸，剛剛就搶先一步發佈左一部同樣以超強續航 4000mAh 大電作主打的 Y6 Pro ，價錢同開賣消息亦比小米早一步公佈，一齊來睇睇啦！

規格屬於入門級，主打 4000mAh 大電

其實從定位來講，華為的 Y6 Pro 更加接近小米今年推出的紅米 3 而不是紅米 Note 3 ，只係在開賣時間上兩者相當接近。係外型同規格上，華為 Y6 Pro 係邊框上用了「金屬塗層」而塑膠質感的機背官方都提到有「符合人體公學的波浪紋理」，屏幕方面就係 5 吋 HD 解像度，而處理器就用左 MTK 的 MT6735 配 2GB RAM 以及 16GB 內置容量（支援最大 32GB SD卡）。而相機就係 f2.0 光圈的 1300 萬像素主鏡頭配 500 萬像素前鏡頭。電池都係一大賣點，有成 4000mAh 而且可以做到反向充電。(可能因為主攻入門機市場，所以官方特意提到有 FM 收音機）

另外要留意，華為提到 Y6 Pro 係支援「中港 4G 雙卡雙待」，呢點看來有需要同大家更清楚解釋。嚴格而言話 Y6 Pro 係中港 4G 雙卡雙待並沒有錯，只係不完全正確，因為從官方資料看來， Y6 Pro 支援的 FDD LTE 頻段並不足夠，缺少了香港常用的 2600 (band 7)，只有 B1 (2100) 以及 B3 (1800)，反而大陸的 TD LTE 頻段就有齊 B38 (2600 CMCC)、B39 (1900)、B40 (2300)、B41 (2600 Unicom) 。最後，係價錢同開賣消息方面，華為 Y6 Pro 將會在 3 月下旬發售，定價為 $1280 ，有金、黑、白三色可選。唔知大家又點睇呢部 Y6 Pro 呢？留言講講吧！


▲ 華為 Y6 Pro 的 5 吋芒解像度是 720P ，版主初步覺得好似光度不太夠。


▲ 機背是塑膠材質，但有波浪紋理。