(#帶着華為P10+旅行影靚相) 韓國首爾+釡山: 食、玩、住 版主「包膠」

左定坤 (Cho Ting Kwan) 2017-04-06 14:44 | Huawei
各位 ePrice.HK 的網友,好耐無見喇~ (其實都唔係話好耐,一個星期左右啫 xD) 是咁的,版主就在上個月尾 (即 3 月 29 日),攞左假去韓國旅行,開始左我八日七夜的釡山、首爾之旅。而剛巧在出發的前一天,版主就去完華為 P10 / P10 Plus 發佈會,向華為借了一部 P10 Plus 試玩,於是乎版主就順便帶埋部 P10 Plus 去韓國影下相,同時亦都想同大家分享一下,版主今次旅程食、玩、住的「包膠」。即刻睇下文啦!

P10 Plus (Facebook).jpg

最緊要平! 三百樓下廉價旅館,值唔值得住?

在講住邊之前,版主需要先同大家交代一下我的基本行程安排係點: 版主在 3 月 29 日去到韓國,一開波先去釡山,到 31 號再由釡山回到首爾,整個旅程一共住了兩間旅館 (其實後來發現,呢個行程安排並不是太好,因為 29 號去到釡山已經夜晚,而 31 號又一大朝早就離開,變相實際在釡山玩的時間,其實只有一日。所以有打算去釡山、首爾的網友,或者可以留多點時間俾釡山唷~)。

好啦! 講完大致行程係點,版主就開始同大家講下,到底版主今次住左邊兩間旅館,同話俾大家知有無伏。如果一個人去旅行,當然可以就咁 book 床位啦,咁就真係要幾平有幾平。但因為版主今程係同女朋友一起去,所以床位呢啲就不是太適合,唯有在 Agoda 網站搵下有無一些廉價有雙人房的旅館。最後,版主在釡山住的是位於西面站附近的 W Motel,而首爾則住在鍾閣站附近的「韓國朋友家」(Korstay Guest House),兩間旅館的價錢,都係三百蚊樓下一晚。

IMG_20170329_145554 拷貝.jpg
▲ 由首爾站搭乘 KTX 到釡山站,車程大約差不多有 3 小時的時間,坐到 pat pat 都痛埋~XD (順帶一提,華為 P10 Plus 鮮豔模式 + 水印,版主覺得好有效果!)

釡山落腳地: W Motel
優點: 鄰近 Metro 地鐵站,交通方便。而且房間空間充足,而且都尚算乾淨,設施亦相當齊備,房入面甚至連電腦都有,以二百幾蚊價錢來說,實在係幾諗得過。
缺點: 無早餐供應,走廊比較陰暗,升降機一打開會見到有個女人的塗鴉,好多次版主都俾佢嚇一嚇。另外,因為旅館下面係 KTV,而房間隔音一般,有時在房入面都會聽到啲人的歌聲。
版主評分: 3.5 / 5

IMG_20170329_185653 拷貝.jpg
▲ 呢間 W Motel 可以說是平、靚、正。

首爾落腳地: 韓國朋友家 (Korstay Guest House)
優點: Counter 職員態度很好,版主個人非常欣賞。另外,這間旅館每朝 8 時至 10 時都會有早餐供應。
缺點: 早餐只有粟米片同麪包,不過無辦法,二百幾蚊咋喎,有得俾你食算係咁啦~ 不過房間方面,空間就稍嫌較小,相比釡山果間細間,加上設施並不夠完備,例如房間裡連水都無得煲 (要落番 B1/F,即食早餐果個 Area 先有得煲)。另外,呢間旅館沒有升降機,當你拎住啲行李上落果陣會相對吃力 (特別是 last day 果陣,掃貨掃得太多,個筴即時變得好重)。
版主評分: 3 / 5

IMG_20170331_154935 拷貝.jpg
▲ 鍾閣站行過去這間旅館,只需大約 2 至 3 分鐘,不過其實初初去果陣,唔係咁容易搵到,因為要行入去啲巷仔先會見到。住的體驗麻麻,但勝在服務態度很好,還是值得一讚。

好玩、靚景好去處! 用手機留下旅遊回憶

戴定頭盔先,版主除左華為 P10 Plus 之外,自己都有帶埋 Canon EOS 760D 去影相,以作不時之需,順便試玩下我枝新鏡頭~ 不過,版主絕大部份時間,都係用 P10 Plus 影相,去左好多不同的地方,影左好多靚相。而由 P9 Plus 用到今日 P10 Plus,版主覺得用華為手機影相,識影一定要開鮮豔模式同埋落水印,咁就算你無學過影相,都可以攝出「懶係專業」的相片 (點解一定要鮮豔模式呢? 香港人鍾意食味精,版主都唔例外,開左鮮豔模式可以令到飽和度提高,啲色 sharp 啲,令張相更有味道),加上 P10 Plus 係用上 2K 屏幕,影完張相喺手機度睇番,確實係好靚,好靚。

釡山必去景點: 龍頭山公園
來到釡山,當然點都要去一次龍頭山公園,順便可以欣賞埋釡山塔啦! 龍頭山公園位於南浦洞站,由 7 號出口出來沿着光復路行大約 10 分鐘左右,就可以見到很長的電梯,只需乘搭電梯就能夠上到去龍頭山公園。上果陣確實係相當方便,不過落黎的時候就要行樓梯,唯有當做下運動咁啦! 龍頭山公園內除左可以見到有釡山塔之外,一上去會見到有一些充滿藝術色彩的店舖,更重要是,可以見到有櫻花! 可惜 Timing 唔啱,如果版主遲多一星期來,或者可以見到更多櫻花。

IMG_20170330_120003 拷貝.jpg
▲ 一離開電梯會先見到不少有特色的店舖。

IMG_20170330_105937 拷貝.jpg
▲ 開啟左 P10 Plus 上的「人像模式」,可以突出人像,將背景模糊,有時候可以影到更有味道的相片 (太曬,對眼都睜唔大~XD)。

IMG_20170330_110608 拷貝.jpg
▲ 龍頭山公園,後面就係釡山塔。

IMG_20170330_113609 拷貝.jpg IMG_20170330_113616 拷貝.jpg
▲ 華為 P10 Plus 前置鏡頭都有人像模式架 (右圖),不過要留意的是,前置鏡頭的「人像模式」,似乎做得唔係咁好,當你放大來看,可以見到版主個頭側邊位置,有啲地方係無模糊到,咁可能會影響到成張相片的感覺。

香港看不到的一幕: 釡山影島大橋
釡山影島大橋位於南浦洞站 8 號出口,上到去直行就見到,好易搵。點解會話,在影島大橋可以見到香港見不到的一幕呢? 原因就係,影島大橋最特別的地方,在於佢每日下午 2 點,就會禁止人同車過橋,然後可以聽到一些音樂,與此同時條橋會升起 15 分鐘,係幾特別的。而點解會有咁嘅設計呢? 據《韓國觀光公社》所述,原來影島大橋呢個單臂式設計,係為左在日據時期方便南港與北港的中大型渡船經過的。不過因為喺其他地方都好少會見到咁嘅設計,所以就吸引到不少遊客遊覽 (當中包括版主XD)。

IMG_20170330_140623 拷貝.jpg
▲ 無錯,一到下午 2 點,影島大橋就係好似咁樣升起左。

IMG_20170330_140813 拷貝.jpg
▲ 加多一張用上 P10 Plus 黑白模式所拍的相片,你又覺得有無「奶味」呢?

隱秘的景點: 釡山慶南賽馬公園
上網睇過,其實呢個釡山慶南賽馬公園,係近年先興起的旅遊景點,一到夜晚就會着哂燈,好靚,所以版主都決定過去走一趟。不過,去釡山慶南賽馬公園最麻煩的地方,在於太過偏僻,而且仲要搭公車,唔識韓文的版主,去程同回程都覺得有點不知所措。好在遇到一些好心的韓國姐姐,話我知幾時要落車,如果唔係......就 GG 了! 慶南賽馬公園的美,非文字可以形容,即刻睇相啦!

IMG_20170330_175203 拷貝.jpg
在下端站乘搭 220 / 221 號公車,或者 7 號小巴,都可以去到這個慶南賽馬公園。當時是黃昏時間,一落車就可以見到夕陽西下的情景,而圖中所見正是慶南賽馬公園的入口,但要注意的是,入到去仲要乘搭接駁巴士入去景點果個位置,如果唔係你用腳行,有排行。

IMG_20170330_180646 拷貝.jpg
▲ 落左接駁巴士,就可以見到呢個售票處,票價係 11000 won。

IMG_20170330_190337 拷貝.jpg  IMG_20170330_190414 拷貝.jpg
IMG_20170330_194707 拷貝.jpg  IMG_20170330_195529 拷貝.jpg
IMG_20170330_195655 拷貝.jpg  IMG_20170330_191929 拷貝.jpg
▲ 係唔係好靚呢? 不過要注意的是,雖然 P10 Plus 主鏡頭已經有 F1.8 大光圈,不過在 Auto Mode 夜拍下,相機自動推高 ISO,放大來看會見到 noise 非常明顯。

IMG_20170330_193107 拷貝.jpg  IMG_20170330_191253.jpg
▲ 夜拍前置相機的表現。不過講真,版主去旅行咁多日,都有用 P10 Plus 去影相,P10 Plus 的前置鏡頭雖然都是 Leica 認証,但影出來的質素,並沒有版主想像中咁好,但主鏡頭的表現,版主是讚許的。

首爾值得一去的地方: 京畿坡州英語村、Heyri 文化藝術村、普羅旺斯村
點解會 group 埋一齊講呢? 因為呢三個地方的距離都相當接近,甚至可以去足一日,所以版主索性 group 埋一齊講。版主先在合井站乘搭 2200 號公車,去到最遠的坡州英語村下車。去完坡州英語村,基本上係可以慢慢行番落去 Heyri 文化藝術村以及普羅旺斯村。這三個村入面,在版主的角度來說,會覺得坡州英語村最靚,周圍的設計好有英國特色,而普羅旺斯村則最多地方行,有好多不同的店舖。

IMG_20170401_105802 拷貝.jpg  IMG_20170401_105936.jpg
IMG_20170401_110812 拷貝.jpg  IMG_20170401_111034 拷貝.jpg
IMG_20170401_111509 拷貝.jpg  IMG_20170401_111841 拷貝.jpg
IMG_20170401_115434 拷貝.jpg  IMG_20170401_132453 拷貝.jpg
▲ 總言之,版主非常喜歡坡州英語村的周圍環境,好有去左英國的感覺!

IMG_20170401_122028.jpg
▲ 去玩都不忙不時自拍一下~XD

IMG_20170401_134711 拷貝.jpg

IMG_20170401_140443 拷貝.jpg
▲ Heyri 文化藝術村,顧名思義即係有好多充滿藝術色彩的設計,係特別嘅,但版主興趣不大。

IMG_20170401_150557 拷貝.jpg  IMG_20170401_151925 拷貝.jpg

IMG_20170401_150712 拷貝.jpg  IMG_20170401_150233 拷貝.jpg
IMG_20170401_145932 拷貝.jpg
▲ 普羅旺斯村相對比較多店舖,而且建築物設計都幾有特色。

去韓國唔影韓服,真係對唔住自己!
去韓國一定要體驗下穿韓服的滋味,如果唔係真係對唔住自己! 在安國站 2 號出口附近,會見到有不少韓服租借的店舖,而版主去果間雖然唔係最便宜,但還是令版主很滿意。租借費用為 15000 won / 2 小時,版主知道有店舖可以做到 14000 won / 4 小時,但當時時間比較倉促,費事左揀右揀,求其入左一間就算。租借完之後,可以步行至附近的昌德宮,影下有些韓服宮廷照。

題外話: 講起影韓服,版主今次的經歷真係認真難忘,入到昌德宮俾成班攝影師圍,問我哋可唔可以俾佢哋影相 冒汗 而最後攝影師亦問版主拎左 email,表示會 send 番啲相俾我~XD

IMG_20170402_113007 拷貝.jpg  IMG_20170402_112128 拷貝.jpg
▲ 版主果日真係好開心,因為影到好多靚相~ 你又覺得用 P10 Plus 影出來的相靚唔靚呢?

講完玩同住,去韓國有啲乜嘢必食的餐廳呢?

必食餐廳 001: 土俗村蔘雞湯
IMG_20170402_144535 拷貝.jpg

IMG_20170402_150144 拷貝.jpg

IMG_20170402_151607 拷貝.jpg
土俗村蔘雞湯位於景福宮站 2 號出口,呢間好出名,上年去又係排長龍,今年去都係排長龍......不過係真係好食嘅。

必食餐廳 002: 陳玉華一隻雞
IMG_20170331_173250 拷貝.jpg
首爾東大門站 9 號出口行 5 分鐘左右就到,唔算太難搵。

IMG_20170331_164436 拷貝.jpg
▲ 話到明一隻雞,顧名思義佢係真係成隻雞俾你啦! 本來仲煩惱緊成隻雞點食,點知原來店員會過來幫你張隻雞分屍,大約煮 5 分鐘左右就食得~ 雞肉好滑,食到 lamp lamp 脷! (雞,全部都係雞~)

必食餐廳 003: 釡山三珍魚糕
IMG_20170331_105943 拷貝.jpg
▲ 版主去果間釡山三珍魚糕,位於釡山車站二樓,成立於 1953 年。

IMG_20170331_103649 拷貝.jpg
▲ 一共有六種口味,分別為芝士、薯仔、蝦、特辣、咖喱以及蕃薯味。單獨一個就賣 1200 won,如果一盒買 (有齊六種味道),就 6900 won。

IMG_20170331_110404 拷貝.jpg
▲ 入面係咁樣嘅。

小結

你可能會問,喂,版主你今次搞乜,到底係寫相機評測,定係寫遊記架? 我會答,Why not both? 講到影相,版主帶着這部華為 P10 Plus,在韓國玩了 8 天,我的心得是,用鮮豔模式 + 水印,是可以影到不錯的靚相,主鏡頭方面表現出色,其 F1.8 大光圈在夜拍上亦比上代有點進步。可惜的是,雖然前置鏡頭都是 Leica 認證,但版主並不覺得特別好,對於喜歡自拍的版主來說,這點就讓版主不大滿意了。不過咁,P10 Plus 最大的優點是,有很多不同的拍攝模式,例如人像模式、黑白模式等等,你可以當佢係一個充滿玩味性的相機,可以有助你拍出不同風格的照片。呀! 順帶一提,這部華為 P10 Plus 現已正式開賣,賣價 $5680,有 6GB RAM + 128GB ROM,你又會唔會嫌貴呢? 

華為 P10 Plus (6GB/128GB) 在文章發表時,賣價為 $5680,按這裡有詳細規格及最新賣價

相關產品 (1)

相關報導 (5)

Android 旗艦手機流暢度比拼!Sony、HTC、三星、LG 誰勝

Android 旗艦手機流暢度比拼!Sony、HTC、三星、LG 誰勝

現時旗艦機的規格越來越相似,使用的處理器類型、RAM和ROM的容量都大致相同,究竟一部手機在實際操作時是否流暢,關鍵可能在於使用的系統版本和廠商如何調校。有外國網站找來6部大品牌的旗艦手機,分別為GooglePixel、LGG6、HTCU11、華為P10Plus、SamsungGalaxyS8Plus和SonyXperiaXZPremium,作一個實際應用的速度測試。

虎仔 / 馬日山 | 2017-06-06
​效能相差兩倍!華為被揭在 P10 上「溝 ROM」

​效能相差兩倍!華為被揭在 P10 上「溝 ROM」

話說當年iPhone6s比人踢爆用咗兩款ROM,成了眾矢之的,大批用家要求換貨。近兩日,華為最新旗艦P10被揭發在P10上分別用了三款記憶體,而且表現差天共地,到底發生什麼事情?

天問 | 2017-04-18
(#華為P10+旅行影靚相) 首爾+釡山: 食、玩、住 版主「包膠」

(#華為P10+旅行影靚相) 首爾+釡山: 食、玩、住 版主「包膠」

各位ePrice.HK的網友,好耐無見喇~(其實都唔係話好耐,一個星期左右啫xD)是咁的,版主就在上個月尾(即3月29日),攞左假去韓國旅行,開始左我八日七夜的釡山、首爾之旅。而剛巧在出發的前一天,版主就去完華為P10/P10Plus發佈會,向華為借了一部P10Plus試玩,於是乎版主就順便帶埋部P10Plus去韓國影下相,同時亦都想同大家分享一下,版主今次旅程食、玩、住的「包膠」。即刻睇下文啦!

左定坤 (Cho Ting Kwan) | 2017-04-06
睇左就知堅係靚! HUAWEI P10 升級 Leica 鏡頭 大量實拍

睇左就知堅係靚! HUAWEI P10 升級 Leica 鏡頭 大量實拍

華為會係三月份公佈最近發表的P10與P10Plus香港賣價,而上一代嘅P9亦進入清貨的階段。大家都是P系,P9與P10有乜唔同呢?係相機部份,看似差唔多,都係用上Leica嘅雙鏡頭,但P10的雙鏡頭,是沿自Mate9的,是第二代。經過華為嘅調教,實際使用上,更有明顯的進步。至於拍出來的成像如何?台灣版主Inno就係西班牙試過,並有大量試相。講乜都係假,睇相知效果!

Keith Yim | 2017-03-05
Leica 鏡頭升級 + 有 2K 芒!華為 P10、P10 Plus 六色現身!

Leica 鏡頭升級 + 有 2K 芒!華為 P10、P10 Plus 六色現身!

打文打到手都抽筋,不過見證着那麼多不同的新機誕生,又確實是值得的!終於都來到一個重要的環節,就是版主個人比較感興趣的手機要發表了!說的是HuaweiP10以及P10Plus。為何會有興趣呢?版主以前用過一段時間P9Plus做主機,做得最好的地方,在於它配備了Leica認證的鏡頭,影黑白相確實是有「奶味」,而其鮮豔模式更令版主出街影風景的時候,不用再輯圖都已經相當滿意。而正正因為用過,版主確實是有點期待,到底新一代的P10,會有甚麼進一步的升級。不再多說,看下文吧!

左定坤 (Cho Ting Kwan) | 2017-02-26

最新新聞