戴上手第一個感覺係HUAWEI FIT比其他同類產品輕，鋁金屬機身重量只有35克，基本上戴咗上手你係感覺唔到佢嘅存在。除咗試用嘅橙色錶帶配銀錶面，官方仲有黑色錶帶配灰錶面，另外黑色嘅分別只係錶帶闊度同長度長啲，提供嘅功能都係一樣
HUAWEI FIT本身支援IP68認證可以防水防塵，有個1.04吋圓型黑白觸控熒幕嚟顯示資料，就算陽光之下都睇得好清楚，仲識得自動著背光。操作方法只要直接喺熒幕度滑動就得，都算易上手
HUAWEI FIT嘅錶帶係用標準嘅18毫米或22毫米，如果你覺得跟機嘅TPU錶帶唔啱你，其實係可以自己換。
錶背有個PPG心率計，用果時就會發出綠色光嚟測心跳。值得一提係HUAWEI FIT係可以24小時持續記錄你嘅心跳，仲可以直接喺錶、又或者透過「華為健康」 (HUAWEI Health) Apps睇番心跳資料。
HUAERI FIT充電果時要放喺跟機嘅專用底座，親身試電量夠用一星期，一定夠你做運動上嘅需要
HUAWEI FIT 同時支援Android同iOS，可以喺Google Play或App Store下載「華為穿戴」 (HUAWEI Wear) 應用程式再經藍牙連接手機。輸入埋自己嘅性别、身高、體重、出生日期等資料，就會幫你計算卡路里燃燒同埋健康提示
HUAWEI FIT所有記錄嘅數據係可以用「華為健康」呢個應用程式睇番，佢可以畀你睇番每日行咗幾多步、燃燒嘅卡路里、心跳同睡眠時間等等， 仲可以將資料分享畀其他健康追蹤apps用如Google Fit
「華為健康」有個培訓計劃功能，佢提供5 公里、10 公里、半馬拉松同馬拉松模式，再根據過往紀錄嚟訂立預期嘅運動目標。預計好目標就可以喺app或HUAWEI FIT度睇番進度，啱晒愛運動之人。
跑緊步或做其他運動果時，HUAWEI FIT係可以即時顯示你嘅運動相關資料，例如喺跑步時會有每公里距離同心跳率提醒，心跳率係咪太快或太慢等。
完成訓練之後喺HUAWEI FIT亦會有訓練報告，裡面啲數據極之詳細，包括跑步距離、時間、步數、卡路里燃燒量、心跳範圍、恢復時間同訓練得分等等，其實所有數據都可以喺番 「華為健康」度睇，仲方便。
HUAWEI FIT會將心跳率劃分成五個階段，包括熱身、燃脂、有氧耐力、無氧耐力同極限，直接喺「華為健康」度睇番就知自己做運動時嘅心跳率係點。官方話如果就到maximum heart rate （220 – 自己歲數），隻HUAWEI FIT仲會有提醒，但係我仲未試過（自己唔想個人咁overload）
作為運動手錶，HUAWEI FIT當然係全天候使用，佢係支援IP68同5ATM防水等級，即係話有50米嘅防水，就算戴住嚟游水都得。
為協助用戶調節日常作息，HUAWEI FIT能監測深度睡眠、淺度睡眠及記錄睡眠質素，作息情況顯然易見。記得，用呢個功能瞓覺果時一定要戴住HUAWEI FIT，唔係就好似我咁只係紀錄到小睡嘅資料。
HUAWEI FIT仲有個功能係可以顯示Android手機嘅通知內容，用之前要喺「華為穿戴」開番個推送訊息功能，再揀番邊啲應用程式嘅通知項目。當手機收到通知後，就會喺隻錶度顯示。
HUAWEI FIT內置咗唔同嘅錶面選擇，鍾意用邊款隨你鍾意。
