劈價千三蚊！6GB / 128GB 四千大電旗艦新低價，呢個價有更好選擇嗎？

左定坤 (Cho Ting Kwan) 2017-09-09 12:05 | Huawei

手機有無必要去到 6GB，甚至 8GB 咁誇呢？對於版主來說，就算係 4GB 已經好夠用，但仍然有網友會繼續沉醉於數字世界，同版主講試下玩《天堂 2》，睇下用唔用得盡 6GB 喎。我想講，我都有玩《天堂 2》，用 4GB / 64GB 的三星 S8 玩，完全無問題喎～6GB？可能真係會令系統順啲嘅，但係咪真係用得盡？好難。不過，既然網友鍾意 6GB 手機，版主就同大家講下近日減價的 6GB 手機，劈價千三蚊，你又會唔會買？呢個價錢，又會唔會有更好選擇呢？睇下文啦！

迎接 Mate 10！華為手機跌落新低價

今次減價的 6GB 手機，係華為 Mate 9 Pro。建議零售價為 $6280，大舖原本係賣緊 $5580，去到今個月出現了新低價，最新賣價為 $4980，原價直劈千三蚊。唔好睇小千三蚊，$4980 買到部 5.5 吋 2K 芒 + 20MP / 12MP 雙 Leica 認證主鏡頭，而且仲要有 128GB，算係咁啦～好似係 。相比起最新的 S835 旗艦 Nokia 8，雖然 Mate 9 Pro 係貴啲，不過我個人覺得，Mate 9 Pro 的 Leica 認證鏡頭，比 Nokia 8 的蔡司認證鏡頭表現出色得多，假如只有兩部俾我揀，我會揀 Mate 9 Pro。

除左 Mate 9 Pro，事實上 P10 / P10 Plus 在上月尾都跌左價，當中最平的係衛訊，有暗價，比出面豐澤平多 $100，P10 最新賣價為 $3980，而 P10 Plus 最新賣價則為 $5080。不過在外觀上，我就覺得都係 Mate 9 Pro 靚仔一點。

呢個價位仲有無其他更好選擇？

不過，總會有人覺得，$4980 買大陸機，傻的嗎？係嘅，呢個價錢，其實應該仲有更好的選擇吧？就好似三星 S7 Edge (128GB) 咁，大約半個月前大舖亦都減到 $4998，雖然你可以話佢已經係舊年旗艦機款，唔值咁貴，但版主個人最喜歡就係佢嘅相機。即便沒有 XX 認證，但影出來的相片，都是非常美觀 (主要係因為有味精 )。嫌部機舊，再唔係一係等 Sony XZ1，大舖會有即減賣 $4998，有 S835 處理器，但就只有 4GB RAM + 64GB ROM，又會唔會係你嘅考慮名單內呢？四千幾蚊又有邊部啱你呢？



華為 Mate 9 Pro 在文章發表時，大舖賣價為 $4980，按這裡有詳細規格及最新賣價。
華為 P10 在文章發表時，大舖賣價為 $3980，按這裡有詳細規格及最新賣價。
華為 P10 Plus 在文章發表時，大舖賣價為 $5080，按這裡有詳細規格及最新賣價。
三星 Galaxy S7 Edge 128GB 在文章發表時，大舖賣價為 $4998，按這裡有詳細規格及最新賣價。
Sony Xperia XZ1 在文章發表時，賣價為 $4998，按這裡有詳細規格及最新賣價。