開賣不足半年被揭停產?Sony Xperia XZ 大舖驚見三千有找!

左定坤 (Cho Ting Kwan) 2017-03-23 19:26 | Sony
Sony Xperia XZs 以及 XA1 現已開始接受預訂,雖然新機將會上場,但通常舊代旗艦都會繼續開賣,就好似 LG V20 出,V10 依然同時存在一樣,無乜衝突,最多都係劈下價清貨。不過,版主今日行場,突然發現現有 Sony Xperia XZ 驚現超低價!居然三千蚊都唔使!向店員查詢過,佢話停產、唔再賣喎......到底呢個消息係真還是假呢?



Sony(Facebook).jpg


百老匯揭 Sony Xperia XZ 停產,最後賣價劈到 $2999?


版主行場的時候,經過百老匯,咁就循例入去行下啦,唔使行到好入,淨係正正喺個門口,見到 Sony Xperia XZ 驚現 $2999,你要知道,果下版主個心真係差點跳左出來!三千蚊唔使入到旗艦手機 Xperia XZ,係一件好恐怖的事,中階系列 X Compact 都不過賣緊 $2998。呢個時候,版主當然第一件事影低張相先,然後衝入去問下,係咪擺錯牌定真有其事!根據店員的描述,無錯係 $2999,不過係陳列品,而且已經賣哂,停產唔會再翻貨。OK,咁版主再去左第二間百老匯睇,直澄連 Xperia XZ 的蹤影都沒有,店員亦都確認 Xperia XZ 停產,全線百老匯都已經無哂貨。嘩,呢部旗艦手機開賣左五個月咋喎,無理由咁快就停產吧?



17474221_408564426169036_1129415574_o.jpg

▲ 唔係版主亂吹,有圖有真相,$2999!不過好心百老匯,無貨就唔好擺出黎啦,仲要陳列價又唔寫清楚!不過,$2999 入手到 Xperia XZ 的話,真係抵到痴線,你認唔認同呢?


是否真有其事?豐澤、衛訊、蘇寧又點回應呢?


Sony Xperia XZ 最後清貨價 $2999 呢單料都未夠爆,開賣五個月停產先係爆!呢個時候,好奇的版主當然四出向其他大舖,如豐澤、蘇寧、衛訊求證啦!經過一連串的調查,三間大舖都表示並無收到 XZ 停產的相關消息,而有衛訊職員更指,係百老匯自己無貨,先貼個咁嘅價出來啫!現時三間大舖 Sony Xperia XZ 依然係有貨,最新賣價仍然是 $4498,估計到 Xperia XZs 正式開賣後,就會再有調整。到底係百老匯亂貼價錢牌,還是其餘三間大舖收風收得慢呢?網友又點睇呢?



17091248_397839683908177_609944361_o.jpg

▲ 其餘三間大舖現時最新賣價依然是 $4498,暫時未有收到 Xperia XZ 會停產的消息。



【25/3 14:38 更新】經 Sony Mobile 確認,Xperia XZ 並沒有「停產」這回事,大家可以放心購買



Sony Xperia XZ 在文章發表時,大舖賣價為 $4498,按這裡有詳細規格及最新賣價

最新新聞